AMPATI: World Environment Day-ko maniani salo, South West Garo Hills a·jani Bashbari Secondary Skul kal·chakram biapo, burungni ka·namgijagipa mongma mangsa re·baenba mangsan kal·grike dongenganiko nikna man·aha.
Jolo songdongenggipa manderangni aganani gitade, ia mongma skanggipa Bashbari Secondary skulni bakrao robolko tingrurue kal·e roaha aro adita somoirangnan uno kal·e roangaha. Uni ja·mano, ua sepango donggipa litre 500-ni chi donchakani tank aro pipe-ko bakrao tinge kal·angaha.
Iandake nikronggija burungoni matburungni kal·grike roani bewalo nikgenchimoba uni chong·mot bewalko agana gita man·ja maina iandakgipa matburungni bewalrang ka·onanggipaba ong·na man·aia ine sepangjolo donggipa manderang an·tangtangni mikrake donganikoba parakataha.
Mande aro mongma baksa chagronganio Garo Hills-o bang·a a·sel obostarangni gimin knasona aro nikna man·engon, Bashbari Secondary skulo ia mongmani re·baanichi skulo poraienggipa bisarangna aro sepangjolo donggipa manderangna maming saknaani, gimaani ba janggina kenchakanikode, skulni bakrao kal·grike roanggipa burungni mongma ong·atangjaha.
