SHILLONG: Adita salrangna skang, Sohra jolni a·dare damsaoniko man·gipa sogimin manggisi Raja Raghuvanshi-ni siani a·selko Central Bureau of Investigation (CBI)-chi sandirokchina gita didie, sianggipa mandeni ma·drangrang, a·songni Prime Minister Narendra Modi-na sedoataha.
Madhya Pradesh a·dokni Indore songjinmao bia ka·daldale re·bagipa jiksesa, Sohra jolo gimaani ja·man, Raja Raghuvanshi-ni sogimin manggisikode sandienggipa dolrang, Sohra samba jolo donggipa Sohrarim a·dareoniko man·aha indiba uni jikgipa Sonam Raghuvanshi-kode da·onan man·skakujaengachim.
Ia jiksesa, re·anggipa May-ni 22 tariko, Mawlakhait songona sokbae, songo manderangko re·dilgipa Bah Wansai baksa Nongriat-ni Double Decker Root Bridge-ko nina re·angahachim. Uamang Nongriat-o, Shipara Homestay-o waltue, May-ni 23 tariko Mawlakhait-ona re·angpilna gita ia homestay-oni re·ongkatangaha indiba ua somoionin uamang jiksesa nikpiltaijaha.
May-ni 24 tariko, uamangni para ra·e re·anggipa scooty-ko Sohrarim-oniko man·aha aro iani ja·mansa uamangni gimaani bidingo police-rangna FIR ka·angaha.
Iana skang, May-ni 22 tariko uamang, Saitsohpen Sohra-o donggipa Manha Homestay-oba napangahachim indiba ia homestay-o biap dongjani gimin aro mikkarang jimbee waengani gimin an·tangtangni bakosrang baksa biming aro phone nomborko on·e, uamang gipin biapko sandina re·angaha aro ja·manosa uamang Nongriat-ona re·angaha ine official-rang parakataha.
Ia jiksesako dingtang dingtang biaprangoniko sandiani ja·man, Raja Raghuvanshi-ni sogimin manggisikode June-ni 2 tariko man·aha indiba jikgipako da·onan man·skakujaenga.
Indake ong·engon, sianggipa Raja Raghuvanshi-ni bidingo CBI-chi sandirokatchina mol·mole uamang, PM-ni office-na chittiko sedoataha ine Raja-ni adatang Vipul Raghuvanshi parakataha.
“Raja-ni siani a·selko ma·sina man·na gita CBI-chi sandirokchina dabie chinga commissioner-ni jako, PM-ni office-ona chittiko on·ataha. Raja Raghuvanshi-na chinga kakket bichalko nangnikenga aro chinga ka·donga ian Sonam-ko man·pilnaba dakchakani ong·gen,” ine ua aganaha.
Gimakuenggipa Sonam Raghuvanshi-ko songni manderangan rim·gittangna nanga ine uni ma·drangrang chanchichiptokskaengachim.
 |
ReplyForward
|
