SHILLONG: Indore-oni songrebagipa tourist jiksesani Sohra-o gimaani adita salrangni ja·mano segipa Raja Raghuvanshi-ni manggisiko man·aha, jekon post mortem ka·ani ja·mano saoba so·ote galaha ine ma·sina man·aha, unigisepon uni jikgipa Sonam-kode da·alonaba man·kujaengani gimin, a·sel obostarang maidake mancha ong·aha chong·motko ma·sina gita man·chipkujaenga, unomitingo gimagipa nokdangni manderang a·jolni manderangko matnangskaenga aro mitampak media-de a·dokkon songre-songbatgipa manderangna kenchakani gnanggipa a·dok ineba matnange parakengon, Raghuvanshi jiksesani kosako dosi dakgipani kosako a·doktangniba ong·chong, gipinoniba ong·chong, sorkari sasti gri watjawa ine Tourism Minister, Paul Lyngdoh Sonibaro aganaha.
A·doko a·sel ong·anirang gisepo iara dingtangtegipa ong·a ine aganengon, skang chasongonin Sohrao tourist-rangko chadrapani dongja, uamang tourist-rangko namen jakkala, maina ia a·jolan Meghalaya-ni tourism industry-ni mongsonggipa biap ong·a, Lyngdoh aganaha.
“Sohrao darang tourist-koba doka-sata dongkuja” ine aganengon, Raghuvanshi jikesana ong·a obostarangko chagrongani ja·mano, Sohraona darangba re·angtokjawaha ine chanchiachim, indiba da·oba hajal hajal manderang tourist-rang Sohraona roangtokkuenga, Tourism minister aganaha.
“Sohrani manderang tourist-rangchin janggi tangna man·engode, uamang maikae an·tangtangni janggi tangani chol-ramako cha·sotgen” ine aganengon, a·selrangko matchote sandina gita Special Investigation Team-na cholko on·na nanga ineba ua agandapaha.
Ong·a a·selrangko CBI-chi sandiatchina gita nokdangni manderangni dabiengani gimin sing·on, gadang gadang dakesa ja·ku de·na nanggen, da·omitingode Special Investigation Team (SIT)-an uamangni kamko ka·enga. CBI-chi sandiatna nanganiko da·o dipet nikjaenga, SIT-ni kam ka·a chu·sokjaosa gipin ja·kuko de·gen, dos dakgipani kosako chinga mamingkoba dongnujawa ine Lyngdoh aganchakaha.
Unomitingo, Sohrao ong·nanggija obosta ong·aniko CBI-chi sandiatchina gita Madhya Pradesh CM Mohan Yadav, Union Home Minister Amit Shah-ko didiaha.
Madhya Pradesh CM Mohan Yadav-ni tweet ka·atgipao janapatani gitade, Madhya Pradesh police-ni dal·batgipa official-rang, Meghalaya police-ni official-rang baksa agangrikatenga. Tourist jiksesani a·sel ong·ani bidingo MP-ni CM, Meghalaya Chief Minister, Conrad Sangma baksa golpogrikenga, jeon da·o gimaenggipa Sonam Raghuvanshi-ko sandiani bidingo rake kam ka·na Meghalaya CM ku·chakataha ineba Yadav, tweet ka·ahachim.
Sohrao gimagipa tourist jiksesaoni segipa Raja Raghuvanshi-ni manggisiko adita salrangni ja·mano man·pilaha indiba jikgipa Sonam-ko da·o dipet man·kujaenga.
