TURA: Sohra jolo ong·gipa a·selko name ma·sichenggija aro kakketko sandichenggija a·dok gimikko matnangahani gimin Garo Hills-ni A·chik Youth Welfare Organisation (AYWO) aro Confederation of Meghalaya Social Organisations (CoMSO), sianggipa Raja Raghuvanshi-ni nokdang aro national media-ko jegalatenba, iandake a·dok gimikko ong·gija dake biming man·atahani gimin kema bi·china dabiangaha.
“Sohra jolo Raja Raghuvanshi aro uni jikgipa Sonam-ni gimaani ja·man Meghalaya a·dokko ong·gija dake matnangahani gimin aro a·gilsak gimikni nikanio, namgijagipa biap dake mesokahani gimin chinga Raghuvanshi nokdang aro national media-ko raken jegalenga. Ia a·selko da·o pilakan ma·sina man·aha aro ia a·selo a·dokni manderang maming dakeba jak dongja ine mesokna man·ahani gimin Meghalaya a·dokni manderango kema bi·china chinga dabienga,” ine a·dokni dingtang dingtang dolrang parakataha.
Meghalaya a·doko Inner Line Permit (ILP)-ko ra·gatchina a·dok sorkario dabiangskaengon, a·doko ILP donggenchimode gipin biaprangoni re·baenggipa tourist-rangko nambate nirok sandina aro iandake skatang dakgipa kamrangko champengna man·genchim ine NGO-rang parakataha.
Ia a·sel ong·anina Meghalaya a·dokko matnanggipa manderang aro national media-ni kosako rakgipa ja·kurangko de·china a·dokni Chief Minister-ko didiatengon, Raja Raghuvanshi-ni adatang aro mitam national media-rango, Meghalaya a·dok gimikon ong·gija dake matnanganiara dingtang dingtang jatrangni gisepo mitchigrikaniko ra·bana aro niam gita sandirokaniko champengna jotton ka·ani gita ong·aha ine AYWO aro CoMSO parakataha.
Meghalaya Police-ni kamrangko matnangahani gimin suk ong·gijaniko parakatskaengon, ia kamko Meghalaya Police, jolo songdongenggipa manderang aro NDRF, SDRF gita dakgipa dolrang baksa nangrime sandina man·ahani gimin Home Affairs Ministry gita ba Parliament gita Meghalaya Police-ni namgipa kamrangko parakatchina NGO-rang, India sorkariko didiatskaaha.