RESUBELPARA: Sombar salo, Tura-ni MP Saleng A Sangma, District Development Coordination & Monitoring Committee (DISHA)-ni tom·aniko North Garo Hills a·jao ong·atenba, dingtang dingtang department-rangni jako ra·e ka·enggipa ma·mong sorkarini scheme-rangko nipilangaha.
Ia tom·aniko Resubelpara-ni DC Conference Hall-o ong·atangaha aro ia tom·anio Tura-ni MP, jinmana aganprakengon, ma·mong sorkarini on·enggipa namgnirangko songni nokni manderang man·china gitasa dingtang dingtang scheme-rangko chu·sokate on·na nanga ine North Garo Hills a·jani officer-rangko didiangaha.
Dingtang dingtang scheme-rangko chu·sokatengon, dongimin niamrangko ja·rikchina aro somoi gita kamrangko matchotatchina Sangma didiangaha.
“Ma·mong sorkarini scheme-rangko name chu·sokataha ine lekkarangosan janapaijachina indiba songni nokni manderangsa iandakgipa scheme-ni namgnirangko man·na nanga,” ine MP Saleng Sangma aganaha.
Dingtang dingtang department-ni ning·o ka·enggipa scheme-rangni chu·sokanirangko knatime ra·angengon, iandakgipa scheme-rangko nambate chu·sokatanichi manderangna nambate dangdike on·china Sangma didiangaha.
Ja·mano, DISHA-ni membor-rang, dingtang dingtang scheme-rangko an·tangtangan re·e niangaha.
Ia tom·aniko ong·atani bidingo North Garo Hills a·jani Deputy Commissioner Dr Abhishek Saini, tom·anio bak ra·giparangna talate on·angengon, North Garo Hills a·jao pilak scheme-rangkon name chu·sokatchina District Administration kam ka·enga aro pilak department-rangkon kamtangtangko nirokjringchina aro an·tangtangni scheme-ni report-rangko on·jringchina ge·etaniko on·rongenga ine parakataha.
Ia salni bako Tura MP-ni nianggipa mongsonggipa department aro scheme-rangara, PMGSY, PWD, MGNREGS, Social Welfare, Development Branch (DC office), PHE, Water Resources, AH & Vety, Health, Soil & Water Conservation aro Education department-ni scheme-rang ong·a.