SHILLONG: Raja Raghuvanshi-ko so·otanio jak donganina uni jikgipa Sonam Raghuvanshi aro gipin sakbri manderangko rim·ahani gimin dos dakanio mongsonggipa Sonam-ko Meghalaya a·dokona rimbae bichal ka·na gita a·dokni dolsa police-rangko, Uttar Pradesh a·dokni Ghazipur-ona watataha.
Koborko on·ani gitade, Sonam-ko Mongolbar salon Meghalaya a·dokona rimbagen aro Shillong songjinmani District Court-o mikkangpaatgen.
An·tangni segipako so·ote Meghalaya a·dokoni katangpilani ja·man Robibar walo ua, UP-ni Ghazipur-o donggipa Nanganj Police Station-o bame on·eaha aro uko Ghazipur-ni hospital-o be·enni gita porikka ra·ani ja·man Ghazipur police-ni ning·o donengaha.
Sonam-ko Sombar walon Patna-ona rimanggen aro Mongolbar salo uko Patna-oniko Guwahati-ona sildorengo rimbae, Guwahati-oni rama gita Shillong-ona rimbagen.
Police-rangni u·iatani gitade, Raja Raghuvanshi-ni jikgipa Sonam, setangko so·mal donenba, Raj Kushwaha baksa mikchagrikaha aro uandaken Raja-ko so·ote galna gita ua sakgittam manderangko tik ka·e, Shillong-ona re·baaha.
Police-rangni am·sandie man·ani gitade, uamangni Meghalaya a·dokona sokbaani ja·manba Sonam, Raj Kushwaha-na phone gita message-rangko watjringe, uko so·otna tarie dongaha aro uandaken ia a·selna Sonam-ko man·chape gimik sakbonga manderangko police-rang rim·aha.