SHILLONG: Re·anggipa Sonibar salo, Umroi-ni Mawlein Mawkhan-o donggipa Thrills Fun Park-ni nokgipa Eugene Niangte-ko Uttar Pradesh a·dokoni re·bagipa dolsa tourist-rang, chu pekenba kragija dake chadrapaha ine kobor on·aha.
Iani bidingo kobor ra·timgiparangna u·iatengon, dolsa tourist-rang churing chupekenba ia park-o bi·sarangni kal·chakaniko nosto ka·ani ja·man dolgnini gisepo jegrikna a·bachengaha ine park-ni nokgipa parakataha.
“Uamangni ong·gija dakanina anga aganon, uamang angko inpangpilna a·bachengaha aro angko chadrapaha. Ja·mano angni park-o kam ka·enggipa manderang rikbaani ja·mansa uamang chadrapako dontongaha,” ine Niangte aganaha.
Niangte-ni aganani gitade, Sohra jolo ong·gipa a·selrangchi tourism-ni kamrang nangchakeaniko man·engani gimin ua an·tangko chadrapgipa manderangni kosako FIR ka·jahachim. “Ua somoio anga ia manderangni kosako FIR ka·jana tik ka·ahachim indiba da·o Sohra-o a·sel ong·aniko name ma·sina man·ahani gimin anga ia manderangni kosako ding·chaoe, parakna nangao ga·akaha,” ine Niangte aganaha.
Indake ong·genchimoba ua somoio uamang, ia tourist-rangko maming dakgija watataiaha ine Thrills Fun Park-ni nokgipa aganaha.
“Sohra-o a·sel ong·anichi ja·mano obostarang namjabatangnaba gnang ine chinga uamangko dangtapjaha. Ja·mano uamangko ia park-oni re·angchina aganon, uamang re·angtokaiaha,” ine Niangte aganaha.