TURA: Deficit skulrango skigiparang, re·anggipa March jaonin jagittamni dormaharangko man·tokkujaengani gimin Garo Hills Deficit School Teachers & Employees Association (GHDSTEA)-ni ning·o skigiparang, da·al Bristibar saloni a·bachenge salgnina kam ka·gija jinma chutti ra·gopangaha.
Iani bidingo association-ni dilgiparang, skultangtangni principal-rang, headmaster-rang aro gipin dilgiparangnaba u·iataha.
“Dormahani bill-rang baksana 46% Dearness Allowance (DA)-ko tarichina a·jatangtangni DSEO-rang aro SDEO-rang ge·etaniko on·ahani gimin nangchakegipa office-rangba ra·chaktokaha aro iako Directorate of School Education & Literacy (DSEL)-ba ra·chakahachim. Bill-rangko on·e pass ka·ani ja·manba chingna jagittamni dormaharangko on·kujaenga,” ine GHDSTEA-ni dilgiparang parakataha.
An·tangtangni dormaharangko man·tokkujaengani gimin skigiparang, a·dokni chief minister, education minister, aro education official-rangko baditaba chang gronge mol·molaha aro uamang dormaharangko on·na gitaba ku·rachakahachim indiba da·alonan deficit skulrango skigiparangna dormaharangko on·kujaenga ine association-ni dilgiparang parakataha.
“A·gilsakni seng·aniko on·enggipa skigiparang, iandake dukko chake kamko ka·na nangengani a·sel bang·en neng·nikanirangko chagrongna nangtokenga. Chinga chatro chatrirangni lekka porako nosto ka·na miksonge iako dakenga ong·ja indiba an·tangtangni dedrangnan skul fee-rangko aro gipin nanga korosrangko ka·na man·jaengani giminsa sorkarina u·iatna miksonge salgnina jinma chutti ra·gopenga,” ine GHDSTEA-ni dilgiparang talataniko on·angaha.
Deficit skulrango skigiparangni neng·nikanirangko ma·sichakchina aro skigiparangna jagittamni dormaha baksana 46% DA-koba ta·raken on·china gita GHDSTEA-ni dilgiparang, a·dok sorkari aro Education department-ko mol·molataha.