SHILLONG: Raja Raghuvanshi-ko Sohra jolo so·otanina rim·ako man·gipa Sonam Raghuvanshi aro Raj Kushwaha sakgnian, an·tangtangni dosko ku·rachakaha ine Bristibar salo, Eastern Range-ni Meghalaya DIG Davis NR Marak parakataha.
“Sonam aro Raj sakgnian, Raja-ko so·otanio jak donga ine ku·rachakaha,” ine Marak, kobor ra·timgiparangna aganaha.
Marak-ni parakatani gitade, ia a·selni bidingo sandirokaniko a·bachengatmiting somoion police-rang, Sohra-ni homestay damsao Raja aro Sonam-ni donanggipa bakosko man·aha.
“Ia bakoso chinga ‘mangalsutra’ aro jakstemko man·aha aro iachin Sonam tangkuenga ine chinga chanchichipna a·bachengaha. Tourist-rang roramgenchimoba ramramde mangalsutra-ko donangjawachim,” ine Marak aganaha.
Ia a·selko sandirokna a·bachengmitingode ian so·otama, gimaama ba a·sel ong·asama, police-rang name ma·sikujaengachim ineba ua aganaha.
An·tangko phone-ko Sonam galatama galatja, iani bidingo police-rang name ma·sina man·kujaenga ineba DIG aganaha.
Da·o dipet rim·a man·gipa sakbonga manderangko sakprakpraksa sing·sandiengkua ine janapatengon, sakprakprakko sing·sandia matchotani ja·mansa, uamang gimikko mikkanggrikate sing·sandigen ine Marak aganaha.
Raja-ko so·otna chanchidilenggipani bidingode Sonam aro Raj sakgnian sakgipinko matnangna jotton ka·enga ineba Marak aganaha.
“Da·o Sonam-ba Raj-ko dakdilgipa ine matnangenga aro Raj-ba Sonam-kosa dakdilgipa ine matnangenga. Uamangni ku·rachakanirang melikujaskal chinga uamangko sing·sandiangkugen. Raja-ko so·otani chong·mot a·selko ma·sina gitade iano dakdilgipako ma·sichengna nangchongmotenga,” ine DIG aganaha.
Rim·a man·gipa sakbonga manderangan kakketko aganenga ine ma·siahaosa, sing·sandianirangko dontonggen ineba ua aganaha.
Sonam aro Raj Kushwaha, niamni a·palo mikchagrikachim ineba police-rangni am·sandie man·aniko Marak parakataha.
Marak-ni parakatani gitade, matnanga man·gipa manderang, Guwahati-ni hotel-o dongachim aro apsan hotel-onikon uamang so·otanio jakkalgipa silchidarekoba breaha.
Sing·sandianirang matchotahaon, matnanga man·gipa manderangko Sohra-ona rimangpilenba, ua salo ong·a obostako mesokchina agangen ineba Marak parakataha.
