SHILLONG: Madhya Pradesh a·dokoni re·bagipa tourist Raja Raghuvanshi-ko so·otanina rim·a man·gipa Sonam Raghuvanshi aro gipin sakbri manderangko sing·sandianirang matchotahaon, maikai ia manderang uko so·otahachim, uko mesokchina gita police-rang, Sohra-ona rimanggen ine u·iataha.
East Khasi Hills a·jani SP Vivek Syiem-ni kobor ra·timgiparangna parakatani gitade, Raja Raghuvanshi-ko so·otanina matnanga man·enggipa manderangko da·o police-rang sing·sandiengkua aro ia manderangko sing·sandiani matchotahaon, a·sel ong·gipa biapo maikai ia manderang so·otachim, uko mesokchina gita ia manderangko Sohra-ona rimanggen.
“Matnanga man·gipa manderangko sing·sandianirang matchotahaon chinga uamang maikai ia mandeko so·otachim, uko mesokchina Sohra-ona rimanggen,” ine Sukrobar salo Syiem, kobor ra·timgiparangna aganaha.
Raja Raghuvanshi-ko so·otani bidingo sing·sandiangkuna gita kachari, matnanga man·gipa Sonam Raghuvanshi aro gipin sakbri manderangko, salchetna police-rangni jako pakwatatahachim.
“Ia manderangko sing·sandina somoirangko nangdapkua ong·ode chinga kachario bi·dapkugen,” ine SP aganaha.
Ia a·selna mongsonggipa ong·e matnangako man·enggipa Raj Kushwaha aro gipin manderang, ia skang Sohra-ona re·baa dongkujachim ineba u·iataha.
Indake ong·engon, dos dakgipa manderang Raja Raghuvanshi-ko Guwahati, Nongriat aro Dawki-oba so·ote galna cholrangko ra·achim indiba somoirang aro biaprang meligrikjae bon·kamao Weisawdong Falls sambao so·otaha ineba police-rang parakataha.
