RESUBELPARA: Meghalaya a·dokko man·aoni da·o bilsi 50 batpilahaoba, North Garo Hills a·jao gitchambatsranggipa aro bakkandikbatsranggipa ramarangoni dilsa, Resubelpara-Rongrong-Gabil ramako da·alonan tarichipgija aro matchotchipgija donenganina jolo songdongenggipa manderang, suk ong·gijaniko parakattokaha.
Jolo songdongenggipa manderangni u·iatani gitade, Resubelpara-oni Rongrong-ona dakanggipa ramako a·dokni gitcham chief minister Salseng C Marak aro Chamberlin Marak-ni MLA ong·engmiting somoiosa bon·kame black topping on·e tariahachim indiba untalan ia km 17 ong·gipa ramako da·alonan taritaia dongjaha.
Ia ramara, North, East aro West Garo Hills a·jarang gita nappakgipa rama ong·a aro ia rama gita re·anggenchimode manderang, an·sengbatgipa biaprangkoba nikna man·a indiba ramarang obosta namsrangjahani a·selan ia ramako re·ruraenggipa manderang neng·nikanirangko chagrongna nangskaronga.
Resubelpara-oni Rongrong-ona ramani bakroani km 20-mangsan ong·aia indiba ia ramani obosta namsrangjahani a·selan ia rama gita gario songregenchimoba kontagnimang nangskaronga.
“Ia ramako na·a gario re·angenga ong·ode rama namtingjani a·selan third gear dokani cholan dongja. Ia ramani bang·bata biaprangon a·kolrara dakakosa nikna man·aia aro iani a·selan gariko first aro second gear-ona agrede salna man·ja. Ia ramani bidingo chinga changni chang gimiknan u·iatahachim indiba darangan gisik nanganiko mesokja,” ine jolo songdongenggipa mande saksa aganaha.
Jolo songdongenggipa manderangni parakatani gitade, Resu-oni Rongrong-ona dakanggipa rama paktangtangon dam 200-mangni gita songrang donga aro ia songrangara mitamde North Garo Hills-o, mitamde East-o aro mitamde West Garo Hills a·jao ga·aka.
Ia ramara, North Garo Hills a·jao songdongenggipa manderangnade namen mongsonggipa rama ong·enga maina ia ramao donggipa Chidaret songon da·o civil hospital-koba rikengaha.
“Ia biapo single lane-ko tarianichide kam ong·jawa. Angni constituency-o songdongenggipa manderangni namgnina anga ia ramani bidingo sorkari baksaba agangrikahachim indiba da·alonan maming kamrangko ka·kujaenga,” ine Rongrong MDC Rinaldo K Sangma parakataha.
Indake ong·engon, ia ramako taridapanirang dongkujaengoba, ramako name rakkijringna gita tangka paisarangkode oke ra·ahani gimin iani bidingo RTI-ko ka·angaha ine kobor on·aha.
“Chingni ma·siani gitade, ia ramako 1952 bilsio tarichengaha aro gisepode ia ramako taripilrongachim indiba ramako chu·gimik taripilade dongkuja,” ine jolo songdongenggipa mande saksa aganaha.
Ia ramao Dekachang-oni DC office gita dakanggipa km 2-ni rama aro Gabil-oni km 12-13-mang ong·gipa ramako tariana agrede ia ramani gipin bakrangko da·o dipet tariani koborrang dongkuja ine PWD office-oni kobor on·timgipa saksa parakatskaaha.