TURA: Bangladesh a·songoni manderang, niam gri napsrukanirang batroroenganichi Meghalaya a·dokna, mongsongbate Garo Hills-na kenchakna nangani ong·enga ine A·chik Holistic Awakening Movement (AHAM) parakatenba, niam gri napsrukaniko nambate nirok sandina man·na gita bilaken ja·kurangko de·china a·dok sorkariko didiataha.
Iani bidingo a·dokni Chief Minister Conrad K Sangma-na sedoatengon, adita salrangna skang Assam a·dokni Goalpara a·jao niam gri songdong a·chaenggipa 2000-na baten nokdangrangko konta 48-ni gisepon ra·galchina ba wate re·angchina Assam sorkarini ge·etaniko on·aniara, ia jolrango Bangladesh a·songoni niam gri napsrukanirang batroroengaha ine mesokani ong·a ine AHAM-ni president George Prince Ch Momin parakataha.
“Niam gri napsrukbae songdongenggipa manderangko ra·galna aro watatpilna gita Assam sorkaride rakgipa ja·kurangko de·engon, Bangladesh a·song baksa km 443 simarang donggipa Meghalaya a·dokode niam gri napsrukbae songdong a·chaena gita altubatsranga. A·song damgnini gisepo fencing-rangko name kajaode aro bilake nirok sandianirang dongjaode, Assam-oni ra·galata man·gipa manderangba Garo Hills gitan India-ona re·bapilna jotton ka·aigen,” ine Momin parakataha.
Indake ong·engon, Bangladesh a·songoni niam gri napsrukbaenggipa manderangko champengsona man·a gita chu·gimik simarangko kapengchina aro dingtang dingtang cholrangchi bilakbate nirokchina aro niam gri napsrukanirangko nirikkianio, gital kolrang, jekai drone, CCTV aro uandakgipa ostrorangko jakkalchina AHAM didiataha.
“Niam gri napsrukaniara simarangko nirokanio neng·nikanisan ong·aijaha indiba ian Meghalaya a·dokni jatrangna, songsalna, economy-na aro political-naba kenchakna nangani ong·engaha. Meghalaya a·doko songdongenggipa Tribal-rangko je cholchiba chel·chakani somoi ong·engaha maina da·alonin iako chel·chaksojagenchimode haida knalan an·ching namgija a·selrangko chagrongna nangnaba dongaha,” ine AHAM-ni president mikrakataniko on·angaha.
