BAGHMARA: Garo Hills-ni dingtang dingtang biaprango, MegLife project-ni ning·o rikgipa dam 125 community centre-rangko Mongolbar salo a·dokni Chief Minister Conrad K Sangma, South Garo Hills a·jani Baghmara C&RD Block ning·o donggipa Dobakkol A·wemong songoni kulie on·angaha aro ia community centre-rangko kulie on·anio, Meghalaya Legislative Assembly-ni Speaker Thomas A Sangma, a·dokni PHE Minister Marcuise N Marak, Education Minister Rakkam A Sangma, Power Minister Abu Taher Mondal, Mahendraganj MLA Sanjay A Sangma, Kharkutta MLA Rupert Momin, Bajengdoba MLA Pongseng Marak, Rongjeng MLA Jim Sangma, Baghmara MLA Kartush R Marak, Chokpot MLA Sengchim Sangma aro gipinrangba dongpae bak ra·angtokaha.
Ia program-ko ong·atanio a·dokni Chief Minister, jinmana aganprakangengon, gong kror 800 ong·gipa MegLife project-chi a·dokni manderangna janggi tangani cholrangko on·na man·gipa dingtang dingtang kamrangko a·bachengatna man·aha aro iana JICA-ni gita tangka paisarangko dakchake on·aha ine parakataha.
A·dok gimikni dam 12 a·jarango donggipa dam 500 songrango community centre-rangko rike on·aniara, songni nokni dingtang dingtang dolrangna aro manderangna dingtang dingtang kamrangko a·bachengatna cholrangko on·anian ong·enga ineba Chief Minister aganaha.
Chief Minister-ni parakatani gitade, ia project-ni ning·o songni nokni manderang, bol chararangko, gama ge·anirangko, chonchongipa check dam-rangko, pokkrirangko, plastic-ni tengkirangko, chi donani RCC tengkirangko aro gipin janggi tangani cholrangko dake ra·na man·enga.
Ia project-ni ning·o IVCS aro SHG-rangba bak ong·e, namgnirangko man·patokenga ineba ua aganaha.
Indake ong·engon, ia apsan program-ko ong·atanio a·dokni Chief Minister, gipin dilgiparang baksa South Garo Hills a·jani Badri Rongdong songo rikgipa Chitmang Chaiwat Nature-Based Glamping Project-koba a·bachengate on·angjolaha.
Ia project-ni ning·o, Nok A·chik aro PVC dome tent-rang baksa Tourist Cabin Complex-koba rikaha aro ian gipin biaprangoni re·baenggipa manderangko nokchakna chol ong·an baksana jolo songni nokni manderangna janggi tangani cholba ong·gnok ine Chief Minister parakataha.