SHILLONG: Meghalaya a·doko songdongenggipa aro gipin biaprangoni re·baenggipa tourist-rangni naljokgnina Meghalaya Residents Safety & Security Act (MRSSA)-ko jakkalchina gita Mongolbar salo, a·dokni Cabinet Minister aro BJP-ni dilgipa AL Hek, a·dok sorkariko didiangaha.
MRSSA-chi a·dokona re·baenggipa pilak manderangni bidingo sorkari see rakkina man·ani gimin ian gipin biaprangoni re·baenggipa tourist-rangna aro a·doko songdongenggipa manderangnaba namgni ong·gen ine Hek aganaha.
Indore-oni re·bagipa tourist Raja Raghuvanshi-ko so·otanio jak donggipa manderangko ta·raken rim·na man·ahani gimin Meghalaya Police-ko mittelpilangengon, ia a·sel ong·ani somoio Minister-rangoni ua saksasan Sohra-ona re·ange niaiaha ine Hek, an·tangni kosako matnange agangiparangko raken jegalataha.
Indake ong·engon, Meghalaya a·doko mingsinggipa Ward’s Lake-ko nitobatate tarina miksonganio a·dok sorkari, Ward’s Lake-ni chirangko wate galchengna tik ka·angaha.
Iani bidingo kobor ra·timgiparangna talataniko on·angengon, Ward’s Lake-ko nitobatate tarina gita gimik gong kror 7 tangkarangko chamanaha aro Ward’s Lake-ni chirangko wate galanichi, ja·mano chirang grikbatgnok ine a·dokni Tourism Minister Paul Lyngdoh parakataha.
Ward’s Lake-o light aro sound show-na dingtangmancha kror 4-ko chamaha ineba Lyngdoh parakataha.
A·dokni dingtang dingtang tourist spot-rango toilet-rangko rikna tik ka·aha aro ia toilet ge·prakna gong lak 25-ko tik ka·e donaha ine Tourism Minister parakataha.
