SHILLONG: Batanggimin adita somoirangna skango, party-oni ong·katgipa UDP-ni gitcham dilgipa Jemino Mawthoh-ko an·tangtang dolo napna sikgenchimode man·gen ine BJP, uamangni nangniko Mawthoh-na u·iataha.
Koboro parakani gitade, BJP uamangni party-ona re·bana nangnikaniko Jemino Mawthoh-ona parakaha. Indake ong·genchimoba uamangni party-na re·bagenma ba gipin political party-o napegenma da·o dipet mamingkoba aganchakkujaengachim.
Adita somoirangna skang, Mawthoh an·tangni neng·nikanirangko janapenba United Democratic Party (UDP)-oni ong·katahachim ine nikna man·a.
Unomitingo, UDP uni kam watani aro party-oni ong·katna segipa chittiko ra·chakaha, indake Mawthoh-ni kam watani ja·mano party General Secretary-ni post bangbang ong·engahani gimin uni biapo sako songjotgenchim, uani bidingo UDP, re·baenggipa July jani skanggipa antio Central Executive Committee tom·anio chanchirimanggen.
UDP, a·doko bilakroroenga aro party-ni pilak MLA aro party dilgiparangan ku·cholsan kamrangko ka·enga ineba party koboro janapaha.
