TURA: Meghalaya a·doko, mongsongbate Garo Hills-o lekka porani gadangko namdapatna gita Bristibar salo Education Conclave-ko Tura-ni District Auditorium-o ong·atangaha aro ia tom·anio a·dokni Chief Minister Conrad K Sangma, Education Minister Rakkam A Sangma, Captain Williamson Sangma State University-ni Vice Chancellor Dr Vasanthi Vijaykumar aro dingtang dingtang official-rangba bak ra·angtokaha.
Ia tom·bimonganio, dam 20 sorkari LP skulrangko chalaina gita a·dok sorkari, Tura-ni Mothers Union baksa Memorandum of Understanding (MoU)-o soi ka·grikangjolaha.
Ia tom·aniko ong·atanio a·dokni Chief Minister, tom·anio bak ra·giparangna aganprakangengon, a·doko chadamberangni jelbra jelsuaniara, a·dokna ra·biani ong·an baksana kamrangko ka·na gita cholba ong·skaa ine janapatenba, chadamberangni jelbra jelsuaniko namgni ong·atna gita chadamberangna namgipa lekka pora baksana changa sapanirangko on·na nangenga ine aganangaha.
“Meghalaya a·doko bilsi 20-na komigipa lak 20-na baten chadamberang dongani gimin India a·songo Meghalaya a·dokan chadamberangni jelbra jelsubatgipa a·dok ong·enga. Ian an·chingna chol gitaba ong·a aro ra·bianiba ong·skaa. Ia chadamberangko jakkale an·ching a·dokna namgnikoba ra·bana man·a ba a·dokna gimaanikoba ra·bana man·a indiba lekka poranian mongsonggipa bak ong·a,” ine Sangma aganaha.
Sorkari skul aro college-rangko taridapanichi, Captain Williamson Sangma State University-ko kulianichi aro chadamberangna kal·susaani aro doka dam·ani cholrangko on·anichi sorkari, a·doko lekka porako tang·doatna kam ka·enga ineba Chief Minister aganaha.
Lekka porako namdapatanio Mothers Union aro ugita dakgipa dingtang dingtang dolrang baksa bakrime kamrangko ka·na nangengani giminba Sangma aganangaha.
Ia Education Conclave-ko ong·atanio, Meghalaya School Quality Assessment and Accreditation Framework (MSQAAF) aro CM IMPACT Meghalaya Learning Enhancement Programme (M-LEP)-koba Chief Minister, a·bachengate on·angjolaha.
Dingtangmancha lekka poranio simsak nirokaniko nangenggipa chatro chatrirangnaba ia tom·anio skie ra·ani tablet-rangko suale on·angaha.