SHILLONG: Indore songjinmao bading chiwale cha·gipa Raja Raghuvanshi-ko Sohra-ni Wei Sawdong Falls sambao so·otanina matnanga man·gipa uni jikgipa Sonam aro Raj Kushwaha-ko Bristibar salo kachari, salgnina police-rangni jako pakwate on·attaiaha aro ia manderangko police-rang, talbate ma·sina sing·sandiangkugen.
Iana skang, ia a·selna matnanga man·gipa Sonam, uni mikgipa Raj Kushwaha aro gipin sakgittam manderang, chong·motan Vishal Singh Chauhan, Akash Rajput, aro Anand Kurmi-ko kachari salchetna police-rangni ning·o donatahachim aro uandaken police-rangni ning·o donchina on·gimin salchet bon·ani ja·man ia manderangko Bristibar salo, Shillong songjinmani Sessions Court-ona rimangtaienba mikkangpaataha.
“Sonam aro Raj Kushwaha-kode kachari, salgnina police-rangni ning·o donattaiaha indiba gipin sakgittam manderangkode sal 14-na judicial custody-o donatskaaha,” ine kacharioni ong·katbaani ja·man, ukil T Chanda, kobor ra·timgiparangna parakataha.
Re·anggipa Mongolbar salosan, ia mande sakbongako Meghalaya Police-ni Special Investigation Team (SIT), a·sel ong·chakgipa Sohra jolona rimangenba, maikai uamang Raja Raghuvanshi-ko so·otaha, tale sing·sandie ra·aha aro uamangni Raja-ko so·otgipa Wei Sawdong Falls sambaoniko, uamangni Raja-ko so·otna jakkalgipa atte pongsakoba man·daptaiahachim.
Budbar saloba Meghalaya Police-ni dolsa official-rang, Indore songjinmao donggipa Sonam ma·gipani nokona aro so·ota man·gipa Raja Raghuvanshi-ni nokona re·ange, ia a·selni bidingo sing·sandieaha.
