Rajabala: West Garo Hills (WGH)-ni Rajabala PS-ni ning·o ga·akgipa apsanb songo donggipa sakgipin mandeko Morasuti-o donggipa bilsi 32 ong·gipa Aminul Islam chadrapaha uni ja·man attam 5:15 bajirango songni manderang ka·onange Aminul Islam-ko rikaha aro uko doka sata dakanichi ua siaha.
Koborrangko man·soani gitade, Islam jean gisikni gita bilgrigipa saksa Fulbahar Sheikh-ko attechi chadrapaha. Sheikh-ko chadrapani ja·man Islam ua biaponi katna jotton ka·achim indiba songni manderang uko rikaha aro uni jotton ka·e katna am·mitingo uko doka.
Islam-ko dokanio uni skoo ning·tue matako man·anichi aro uni be·en bimangni dingtang dingtang bakrangoba saknaaniko man·ani a·sel ua biapon ua New Bhaitbari-o Durga Mandir-ni biap ning·o police sokbana skangan siaha.
A·sel ong·gipa biapo tom·tomaha aro jinma tom·dakgiparangba dongjaha ine WGH-ni SP Abraham T Sangma aganaha. Mamlako register ka·aha aro Islam-ni manggiko police-ni custody-o nanga ja·kurangko de·na dongkuenga.
