Tura: Meghalaya a·dokni dingtang dingtang jolrango mongsongbate Garo Hills-ni educational institution-rangko simsakgija galchipe donengako nikna man·engon changsatai, West Garo Hills district-ni Raksamgre Civil Sub Division-ni ni ning·o ga·akgipa school-ko galchipe donako niktaina man·aha.
Ian Chanaramgre Government LP School ong·a, ia school, batanggimin bilsi bri somoirangoni nokking gri dongenga. Poraigipa bi·sarang neng·nikako man·genchimoba chakchike poraitokenga. Dolsa CSO- Garo Omniscience for Ethnic and Renaissance and Awakening (GOERA), adita mnisalo ia school-ona re·ange nirokeaon school-ni obosta namgijako u·iataha.
Jolni manderangni aganani gita ia Chenaramgre School-o sak 30 poraigiparang donga aro sak 2 skigipa donga. Mejaomangmang social media-o gipanggipa video-o school bi·sarang jinma apsan tom·dake section ge·sao nape poraiako nikna man·aha. School nokking dongjae mikka waanichi classroom-o chi selako nikna man·aha.
“Sal ding·ani somoiode classroom ning·on sal chakna man·a aro mikka waode auna man·pilgen. Mikka bilonge waode poraigipa bi·sarang aro skigiparangna gipin cholan dongjajok. Iandakgipa neng·nikarangko chagronggenchimoba poraigparang aro skigiparang dolgnian chakchike skia-porani bidako ra·na tikkelnga ine GOERA-ni president Thomas Marak aganaha.
CSO unit-ni school-ona re·ange niangao skiparang school-ni obostani gimin u·iate on·aha. Bilsi bri skangon balwa ta·rakani somoio school-ni nokkingko man·angaha ine aganaha. Adita changna uamang education department-ni authority-na school-ni obostani gimin u·iatahachim indiba maming dakchakaniko man·jaha. Daitoko jako ra·gipa department, mikron nikgija dake aro nachil knagija dake dongaienga.
“School nokking dongjani a·sel poraigipa aro skigipa dolgninan kenchakani ong·a. Chingni team, school-ni obostako nirokna sokangaha aro mikrontangchi school-ni namgija obostako nikeaha. Uni gimin chinga ua school-ko nirokatchina sorkariko mol·mola ine Thomas agankuaha.
