SHILLONG: Meghalaya Chief Minister Conrad K. Sangma, Kohima-o ong·atenggipa 5th Regional Catholic Youth Convention-o bak ra·mitingo, uni political re·mikkangani bidingo aganaha. Bilsi 2013 Assembly election-o sirikaniara uni janggi tanganio maidakgipa salrangko ra·baaha aro maidake ua chakatpilaha, iarangni bidingo aganprakaha.
“Anga jagnina grape dongaha, janggi tanganio sirikaniko chagrongao anga bilongen duk ong·aha aro iako ra·chakna man·jaha. Indiba ua salrangan angni janggi tanganio dingtanganiko ra·baskaha. Jagni ja·man anga chakatpile an·tangko bilakatna krengaha. Indake bilsignina anga sal-wal neng·takgija kam ka·aha aro changgipino election-ko cheaha’ ine CM Conrad Sangma, convention-o tom·dakgipa chadamberangna uni janggi tanganio chagronggipa neng·nikan salrangni gimin parakaha.
Anga election-o sirikja ong·ode, haida ia biapona sokbajanaba dongachim, angni janggi tangani re·mikkanganio chu·sokanirangara Nokgipani ka·saani aro pattiani giminsa ong·a ine Chief Minister aganaha.
Event-o salgro-salaram-ni dingtang dingtang jolrangoni chadambe Chatholic-rang bakko ra·giparang CM Sangma-ni aganprakaniko gisik nangbee knatimaha.
Ua chadamberangko janggi tangani re·mikkanganio ‘chu·sokgijanina kenjachina aro dakgualarangoniko skie ra·china aro bilake chakatpilchina didiaha.
Indake Indian Catholic Youth Movement-ko uamangni changa-sapanirangko aro gisik seng·anirangko entrepreneurship-ona ra·angchina agan-ku·pattiaha. Apsan somoion mande ra·grika, bebera·a aro mande jatna ka·sagrikaniko galjachina agan-ku·pattiaha.
