SHILLONG: Personnel, Public Grievances, Law aro Justice-ni Parliamentary Standing Committee-o membor ong·e Tura MP Saleng Sangma-ko chanchapataha, higher judiciary-ni judge-rangna code of conduct-ni bidingo rongtale agangrikaha.
Chanchirimani somoio kamoni neng·takgimin judge-rangko kamo rakkipilna ranta ka·aniko mingsa mongsonggipa katta bichong dake aganangaha. Sorkario ba gipin institution-rango gitalgipa kamrango ra·angna judge-rang kamoni neng·takangna skang mandadoty period-ko nanganio committee agan-talatangaha.
Agangrikani somoio, mitam Member of Parliament-ni gita sing·doanina High Court judge Justice Yashwant Varma-ni mamlako aganangaha. Justice Varma-na jingjenganiko committee agenda-ni mongsonggipa bak dake uamang aganangaha. Judicial jakgitelaniko aro chu·gimikko man·a rakbatgipa niamrangko tanggitik ra·baaniko talatna membor-rang mamlako jakkalaha ine parakataha.
Judge-rangni kamoni neng·takani ja·man aro judicial apsangrik on·anio uamangni man·gijagipani bidingo sing·doanirang batrikrikenganina iako talatangaha.
