Rakkam, school curriculum-o physical education-ko napatna nangnika

SHILLONG: Meghalaya-ni School curriculum-o physical education ba kal·suaaniko dal·e ra·jani gimin, curriculum-o dingtanganiko ra·bana nangnikaniko Education Minister Rakkam A Sangma aganaha. Meghalaya a·doko kal·susaniko dingtangmancha skie ra·a donggijan changtelaigiparang donggenchimoba kal·susaaniko a·bako dal·e ra·ja.
Physical education-ko dal·e ra·jani gimin parakengon, Education Minister Sangma, indine aganaha, “Physical education an·chingna gamchatgipa ong·achim indiba iako edcuation system ba bang·a skigiparangan dal·e ra·ja. Angni school aro college re·miting salrango chinga kal·susani a·bao maming professional training dongjagenchimoba dingtang dingtang kal·susanirango bak ra·pabeachim.
“Chinga gimik dakgipa kal·susanio bak ra·ronga. Class a·bachengna skangan kal·anichisa a·bachengachim. Indiba da·ode school-rango kal·susaatnirang komiangjok. Bang·a school-rangon skigiparang physical education-ni giminde u·ia indiba uko ja·rikja.”
Indake uni constituency-ni gimin janapataon, ua joloni footballer-rangni Subroto Cup final-ona sokani gimin rasong chaako parakaha. Batanggimin salrango Tura-o Meghalaya Games-ko ong·atao anga bang·a kal·susaanirangko niangaha, uno South West Khasi Hills-oni bang·en medal man·ako nikaha. Anga chanchia, uamangoniba professional training ra·giparang dongjaienggen indiba uamang changtelaigipa ba kal·sana saptelaiparang ong·a. Kal·susanio swimming ba chi jroa aro ring chosusagrikani dongode chingni jolni manderangan man·aigenchim maina chingon ro·batgipa chibima donga, ine Minister aganaha.
An·chingni a·dokni curriculum-ko niatgenchimode namdapatna nanganirang bang·bea. Physical education-ko dal·e ra·ja, indiba iako dingtangatna nangenga ine Minister aganaha.
A·doko changgipa sapgiparang bang·bea, uamangko sandie uamangna cholrangko on·na nanggen, uamang professional training-ko man·genchimode chubatgipa gadangrangona sokanggen.
Indiba sorkari, edcuation system-ko namdapatna raken jotton ka·enga. Physical education teacher-ni post-ko tariaha, ta·raken sorkarini chalaigipa school-rango physical education teacher-ko rakkigen, badiabaonide an·ching a·bachengnan nanggen ine Minister aganaha.