Shukla-ni ISS-ona sokanganiara India-ni gital chasongona re·mikkanganiko mesoka: Modi

New Delhi: International Space Station-ona re·anggipa India-ni Shubanshu Shukla baksa Prime Minister Narendra Modi, agangrikatahaon, ISS-o ‘Bharat Mata ki jai’ ingipa katta gipaha.
“Shubhanshu, na·a da·alo India-ni a·aoni chel·begipa biapo ong·genchimoba India-ni manderangni ka·tongo donga ine PM Modi, Shukla -na aganataha. Uamang sakgni ISS-oni video link gita minit 18 somoina agangrikataha.
Shukla-ni bimingni ortoan namgipa a·bachengani ine ong·a, uni ISS-ona re·anganiara India-ni gital chasongona re·mikkangani ong·enga ine Modi aganaha.
Uandake Shukla-ba uni ISS-ona re·anganiara uni saksani re·mikkangani ong·ja indiba India a·songni re·mikkanganisa ong·a ine aganataha.
“Ianode gimikan namen dingtanga, space station-o somoiko re·ataniara a·gilsako somoi re·ata gita ong·ja. Ia space station-o dongna gita chinga bilsigimik training-ko ra·aha, anga dingtang dingtang system-rangko skie ra·ahachim indiba ianona sokbaon gimikan dingtangaha. Iano gravity dongjani a·sel tusina namen neng·nika. Iandakgipa obostao dongna altua ong·ja ine PM-na Shukla aganataha.
Space station, Earth ba a·gilsakko chang 16 wilwila aro salprakon chang 16 sal naa aro sal napako nikna man·a.
“Da·oba chinga kontaprakon 28,000 kilometer-ko songreenga. Ia ta·rakgipa somoian an·chingni a·songni tang·doaniko mesoka.
Shukla, meja Brisitbar salo International Space Station-ona sokangaha. Unbaksa sakgittam gipin astronaut-rang commercial Axiom-4-o sal 14-na re·angaha.
“Space-oni India-ko nikatchengaon map-o mesokana bate dal·batako nikaha, kosakoni nikataon maming sima ari dongja a·gilsak gimikkon apsan nikata, ine Shukla aganaha.
“An·ching mikkangchi Gaganyaan-ko chu·sokgipa ong·atna nanggen. An·ching an·tangni space station-ko rikna nanga, jedakode an·chingni India-ni astronaut-rang jajongona re·angna man·gen.
“Nang·ni ISS-ona re·ange skie ra·anirangara mikkangchini mission-rangna dakchakgipa ong·gen ine PM aganataha.
International Space Station-o chu·gimik sak 11 astronaut-rang donga, uamang dingtang dingtang dam 6 a·songrangoni ong·a.