TURA: 2014 bilsio A·chik National Volunteers Council (ANVC) dolrangni, a·dok aro ma·mong sorkarirang baksa songgigrikanio soi ka·grikaniko ta·raken chu·sokatchina gita Tura-ni MDC aro ANVC-B dolni gitcham chairman Bernard N Marak, Union Home Minister Amit Shah-ko didiataha.
ANVC dolrang baksa songgigrikaniko gitcham Congress sorkari, bon·atchipe cha·bokani gita ong·aha aro da·onan ia songgigrikaniko chu·sokatkujaenga ineba Marak parakataha.
“Iani giminsa anga da·alo nang·na seachi u·iatna draatako man·aha. Meghalaya a·doko Autonomous District Council (ADC)-rangko bil gnangbatatna aro a·dokni a·bri jolrango tom·tomani baksana namroro silroroaniko ra·bana miksonganiosa ia songgigrikaniko ANVC dolrang, sorkari baksa soi ka·ahachim. ANVC dolrang baksa songgigrikaoni da·o bilsi 10 batpilengahaoba ia songgigrikanirangko chu·sokatchipkujaenga,” ine Marak, Union Home Minister-na sedoatgipa chittio parakataha.
ANVC dolni manderang bang·en an·tangtangko bame on·ahaoba aro tom·tomaona re·bahaoba sorkarini ku·rachakgimin dakchakanirangko man·kujaenga ineba Marak matnangataha.
“Je department-rangkon a·dokoni ADC-rangna watatna nangachim, da·onan ia department-rangkoba ADC-rangona apjitkujaenga. Jadokprak tom·na nanggipa Monitoring Committee-ba 2019 bilsio COVID sajinma a·bachengaonin tom·chipkujaenga. Una agreba, ia songgigrikanio tik ka·gimin gita a·dok sorkari, State Level Monitoring Committee-ko songchipkuja aro State Finance Commission-koba songchipkujaenga,” ine Tura-ni MDC aro ANVC-B dolni gitcham chairman parakataha.
ADC-rango namroro silroroaniko ra·bana miksonge chame on·atgipa tangka paisarangko jakkalsretaha aro mitamkode ja·manchakesa on·atenga ineba Marak matnangataha.
“Uni gimin Garo Hills-ni headquarter Tura songjinmao Central Level Monitoring Committee-ni tom·aniko ong·atna gita Home Affairs Ministry-ni Joint Secretary (NorthEast)-na ge·etaniko on·china anga nang·ko mol·molenga,” ine Marak, Union Home Minister-na seatgipa chittio parakataha.