TURA: Mendipathar College-na skigiparangko ra·ani aro District Selection Committee (DSC)-ni gita kamna seokanirangko jakgitele am·sandina on·china gita RTI activist Cherian Momin, Mendipathar-ni MLA aro Mendipathar College Governing Body-ni chairman Marthon J Sangma-ko didiataha.
People’s College Scheme-ni ning·o sorkarini sanction ka·gimin post-rangna skigiparangko ra·ani bidingo Mendipathar-ni MLA aganchakanirangko on·ani ja·man, iani bidingo jakgitele sandirokna gita cholrangko on·china RTI activist didiataha.
Skigiparangko ra·anio maming niam pe·anirang dongja aro dongnuna jotton ka·anirang dongja ine ua (MLA) chanchienga ong·ode, iani bidingo jakgitele sandirokna on·anian nambatgipa ong·enga ine Momin didiataha.
Momin-ni talataniko on·ani gitade, uni Chief Minister-na badi ka·e seatanio ua chanchichipe ba politics-ni gita didianiko man·e dakjaha indiba nangchongmotgipa lekkarang aro gipin sakkirangko man·esa ua iani bidingo badi ka·e sedoataha.
Iani bidingo Mendipathar MLA-ni talataniko on·na jotton ka·aniara, sandirokaniko champengna, kakketko dongnuna aro kakketna ku·rang on·aniko champengna jotton ka·aniko mesokanisa ong·enga.
People’s College Scheme-ni ning·o kamna dongimin niamrangni gimin talataniko on·angengon, ia kamna seokako man·gipa manderangoni saksade Mendipathar MLA aro Governing Body-ni chairman Marthon Sangma-ni demechik Dingri D Shira ong·a aro sakkirangko man·soani gitade, uaba ia kamna nanggipa poraiani gadang aro gipin nanganirang dongja ine Momin parakataha.
Election-ni somoio chutti ra·a ine matnangenba, Garo lecturer Subroto G Marak-ko ia kamo ra·jahani giminba Momin jegalataha.
North Garo Hills a·jao MLA-ni depanteko District Selection Committee (DSC)-ni membor songani giminba Momin raken jegalataha aro iandake saksa politician-ni dilgipako DSC-ni membor songaniara, kamrangna seokanio ong·gija dakna chol on·aniko mesokani ong·a ine parakataha.