TURA: North Garo Hills a·jani 7th Mile jolo, rama tarienggipa company ge·sa, a·tipko songenba, Manda chibimao paikana watenga ine Garo Omniscience for Ethnic & Renaissance & Awakening (GOERA) dol matnangataha.
GOERA dolni u·iatani gitade, ia company, Dainadubi-oni Darugre-ona dakanggipa NH-217 ramako da·o tarienga aro uamang ramako ta·raken matchotaba matchotangengahachim.
Indake ong·genchimoba, ia ramako tarienggipa company-ni dongchakenggipa a·tipara Manda chibima sambaon ong·a aro ia company-ni manderang, an·tangtangni jakkalenggipa paikanako ia chibimaon watenga ine GOERA dolni dilgiparang parakataha.
“Ia company, uamangni rikgipa paikanani moilarangko Manda chibimaosa watenga ine chingna koborko on·ataha. Chibimarango iandake paikanani moilarangko wataniara, ia chibimako ringna jakkalenggipa manderangna aro matburingrangnaba namen namgijaniko ra·baenga. Iako songni manderang ra·chakna man·chongmotjawa aro ia chibimao paikana wataniko ta·raken dontongna nanga,” ine GOERA dolni dilgiparang parakataha.
Ia chibimako moila ong·atgija rongtale rakkina man·na gita, an·tangtangni jakkalenggipa paikanarangko nama bewalo aro rongtalao jakkalchina gitaba GOERA dolni dilgiparang, ia company-ko didiataha.