SHILLONG: National People’s Party (NPP)-na kam ka·enggiparang manderang, kim·kim ong·e, kamtango gisik nange aro saksa sakgipin baksa nangrime dongna man·genchimode, salgro salaram jolna ku·rang on·timgipa ong·na man·gen ine Meghalaya a·dokni Chief Minister aro NPP-ni national president Conrad K Sangma parakataha.
Salgro salaram jolrango ru·uta bilsirangonin ku·cholsan ong·e ku·rang on·anirang dongkujaenga aro pangnan a·songni kamrango nichanggalako man·ronga ineba ua an·tangni suk ong·gijaniko parakataha.
NPP-ara national party-sa ong·genchimoba, ia party-ni bilde salgro salaram jolosa ong·e, salgro salaram Jolon ja·dil su·kamaha ineba ua aganaha.
Nagaland a·doko NPP-ni dilgiparangna aro party-na kam ka·enggipa manderangna aganprakengon, a·doko NPP-ko bilakbatatna uni niksamsoanirangko NPP-ni president janapangenba, ia jolrango kamrangko namdapatatgenchimode gital cholrangko nakatatna man·gen ine parakataha.
“Salgro salaramni politics-o dingtanganiko nikna man·engaha. An·ching ja·dil su·kame, kamrangko ka·e aro saksa sakgipin baksa nangrime dongna man·genchimode NPP-an, salgro salaramna ku·rang on·timgipa ong·na man·gen,” ine Sangma aganaha.
Ja·mano ua kobor ra·timgipa manderang baksa agangrikangskaengon, NPP-ni pangchakanide, salgro salaram jolrango donggipa Tribal jatrangni ku·rangko on·anisa ong·a ine Sangma parakataha.
Nagaland, Manipur, Mizoram, Arunachal Pradesh aro gipin a·dokrango politics-ni dingtanganiko nikna man·engahani gimin joltangni party-rang, ia cholrangko ra·na nangengaha ineba NPP-ni president aganaha.
Salgro salaram jolrango chagrongna nangenggipa dingtang dingtang neng·nikanirangko namatna gita NPP, ku·rangko on·angkugen ineba Sangma aganaha.
Salgro salaram jolrango NPP-ni dal·rorona man·enganiko janapatskaengon, 2017 bilsio Manipur a·doko vote man·ani 6 percent-san ong·kuengachim indiba 2022 bilsiode 17 percent-ona tang·doangaha aro Nagaland a·dokoba sakgni MLA-oni 2023 bilsini election-ode MLA sakbongaona tang·doangaha ine NPP president parakataha.
Salgro salaram jolo Meghalaya a·dokosan rel ramarangchi nangdimeatako man·kujaengani gimin sing·on, Meghalaya a·doko dingtang dingtang dolrang Inner Line Permit (ILP)-ko ra·gatchengchina nangnikenga ine Chief Minister parakataha.
ILP-na Meghalaya Assembly-oba resolution-ko ra·manaha aro da·o ma·mong sorkarini aganchakaninasan sengkuenga ineba ua aganaha.