SHILLONG: Indore songjinmaoni re·bagipa tourist Raja Raghvanshi-ko Sohra jolo so·otani bidingo police-rang sandirokanirangko dakkuengon, ru·uta sal somoirangonin police-rangni sandienggipa Raja aro Sonam-ni gangipa sonani bosturangko Madhya Pradesh a·doko donggipa Silome James-ni Ratlam Flat-oniko police-rang man·aha.
Ia sonani bosturangko, Alkapuri police-ni dakchakanichi, Sub-Inspector Anthony Khongsit aro sakgipin SI Karan Pachua man·aha.
East Khasi Hills a·jani Superintendent of Police (SP) Vivek Syiem-ni parakatani gitade, Meghalaya Police-ni Special Investigation Team (SIT), laptop, pen drive aro adita lekkarangkoba ua biaponiko rim·aha.
Re·anggipa June 25 tarikosan Silome James-ni ku·rachakanio pangchake SIT official-rang, pistol pongsa, magazine ge·gni aro .32 caliber guli ronggniko Indore-o donggipa chiring dilsaoniko man·ahachim.
Silome James-ni Hyundai i10 garioniko police-rang, gong 50,000 tangkarangkoba man·aha.
Ia tangkarangko ua, Sonam-ni mikchagipa Raj Kushwaha-ni laptop bag-oniko ra·aha ine James ku·rachakaha.
Iani bidingo talataniko on·angengon, laptop bag-kode so·e galakosa man·aha indiba laptop-kode man·kujaenga ine East Khasi Hills a·jani SP Vivek Syiem parakataha.
Syiem-ni aganani gitade, ia laptop-ko Silome James an·tangan ramasamchi galangaha ine ku·rachakaha indiba da·o dipet ia laptop-ko man·pilkujaenga.
Adita salrangna skangsan Meghalaya Police-ni SIT, Indore songjinmani MR3 Hare Krishna Vihar minggipa biapo wa·al so·gimin bag ge·sako man·ahachim aro ia bag-on gong lak 5 tangkarang, pistol, Sonam-ni phone aro Raja-ni ma·manti gam-jinrangba dongachimkon ine police-rang chanchichipani ong·kataha.