TURA: Adita salrangna skang, Raksamgre Civil Sub-Division-ni ning·o donggipa Rengegre songo Pirot R Marak minggipa mandeko uni jikgipa aro gipinrangni so·otani case-o kamrang ka·sina ine matnangatenba, jolo songdongenggipa manderangni namgnina Tikrikilla Police Station-ni officer-in-charge-ko dingtang biapona apjitatchina gita Tikrikilla jolo donggipa dingtang dingtang NGO-rang, chong·motan Pedaldoba, Raksamgre aro uandakgipa jolrangni GSMC, ADIL, FAF aro Save-B Mahal dolrang, West Garo Hills a·jani Superintendent of Police (SP)-ko didiataha.
“Rengegre songo Pirot Marak-ko uni jikgipa Nennen Marak, uni mikchagipa Reknan K Sangma aro Nennen-ni adagipa sakgni, chong·motan Lepson Marak aro Sengba Marak, April-ni 14 tariko so·otaha ine matnangani gnang. Indiba ia case-ni bidingo Pirot-ni ma·drangrang, May-ni 7 tariko badi ka·e, June-ni 12 tariko uni manggisiko bilpilani ja·mansa ma·sina man·aha,” ine NGO-rang parakatenba, sianggipa mandeni ma·drangrang ia a·selni bidingo May 7 tarikon badi ka·ahachim indiba jasa batpilani ja·man June 12 tarikosa uni manggisiko bilpilaniara ia police officer-ni kamtango gisik nanggijaniko mesokani ong·aha ine matnangataha.
“Manggisiko bilpilna gita jasa somoiko ra·chae donganiara manderangni police-rango ka·dongna man·aniko nosto ka·a gita ong·aha aro ian manderangni police-rango bebera·aniko bon·atan baksana sianggipa mandeni nokdangna kakket bichalko on·aniona ja·manchakatani gita ong·aha,” ine NGO-rang parakataha.