TURA: A·chik a·songo git ring·gipa aro dokgipa dam·gipa dolrangni changa sapanirangko nambatatna miksonge Wrath Befall Music Society-ni gita dingtangmancha ‘Battle of the Bands 2025’-ko Sonibar salo, Tura-ni District Auditorium-o ong·atangaha.
Ia Battle of the Bands-ko ong·atna Chief Minister’s Special Grant-ni ning·o dingtangmancha tangka paisarangko sorkari dakchake on·aha.
Ia ‘Battle of the Bands’ beat contest-o Garo Hills gimikoni dol 23 rockband-rang, bimingrangko segatahachim indiba dol 21 rockband-rangsan sokbae bakko ra·angaiaha.
Dol 21 rockband-rangko doksusaani aro ring·susaanio, Tura-ni Nyctophilia dol, chegipa ong·e gong 50,000 tangkarangko boksis dake man·angaha. Unbaksana 1st Runner-ko Emberfall dol chee, gong 30,000-ko boksis dake man·angaha aro V-Aura dol, 2nd Runner-Up ong·e, gong 20,000 tangkarangko boksis dake man·angskaaha.
Una agreba, Best Vocalist-ni boksisko Snowball Effect-ni Sid Ampabni, Best Lead Guitarist-ni boksisko V-Aura dolni Balkimra Chikambe Ch Sangma, Best Rhythym Guitarist-ni boksisko Nyctophilia-ni Carlo Ch Marak, Best Bassist-ni boksisko Emberfall-ni Jordan R Sangma, Best Drummer-ni boksisko Nyctophilia-ni Treslong N Sangma aro Best Keyboardist-ni boksisko Di-Eros dolni Aiesho Demetius S Marak chee, uamang sakprakan gong 5000 tangkako boksis dake man·angaha.
Ia ‘Battle of the Bands 2025’-o Garo Hills-o doka dam·anina niksenggipa manderang, chong·motan Rough Road-ni Silvan Sangma, Tura Music Academy-ni Director Tengrang R Sangma, Ultimate Page-ni Reynold M Sangma aro Restless Desire-ni Rem D Shira, judge-rang ong·e, dingtang dingtang dolrangni doksusaanirangko nisusaangskaaha.