SHILLONG: Sombar salo, Meghalaya Legislative Assembly-ni Petitions Committee, Ri Bhoi a·jani DC office baksa nangrime, dingtangmancha awareness program-ko Block Development Officer-rangna, Self Help Group-rangna aro Non-Governmental Organisation (NGO)-rangna, Nongpoh-o ong·atangaha.
Ia program-ko ong·atanio, Petitions Committee-ni Chairman aro Bajengdoba-ni MLA Pongseng Marak dongjani gimin committee-ni acting chairman Brightstarwell Marbaniang dilangaha aro ia tom·anio, Rambrai-Jyrngam-ni MLA Remington G Momin, Mawhati-ni MLA Charles Marngar, Rajabala-ni MLA Mizanur Rahman Kazi, Nongpoh-ni MLA Mayralborn Syiem, Ri Bhoi a·jani Deputy Commissioner Abhilash Baranwal aro dingtang dingtang official-rangba dongpae bak ra·angaha.
Ia tom·aniko a·bachengatanio Petitions Committee-ni acting chairman Brightstarwell Marbaniang, jinmana aganprakengon, sorkariko chalaianio legislative-ni bidingo ma·sie ra·na nangani gimin aganangaha.
“Ia Petition Committee-ara, an·tangtangni nangani aro neng·nikanirangko Assembly-na u·iatna gita manderangna chol gita ong·a. Sorkariko chalaianio, Legislative, Executive aro Judiciary donga ine pilakan ma·sia aro da·alo chinga maikai legislative-ara kam ka·achim, uarangni bidingo talataniko on·na re·baaha,” ine Marbaniang aganaha.
Ia tom·anio, committee-ni membor-rang, chong·motan Rambrai-Jyrngam-ni MLA Remington G Momin, Mawhati-ni MLA Charles Marngar aro Rajabala-ni MLA Mizanur Rahman Kazi-ba jinmana aganprakengon, an·tangtangni neng·nikanirangko Assembly-na u·iatna man·na gita ia Petition Committee-ona ra·bachina, dingtang dingtang dolrangko aro jolo songdongenggipa manderangko didiangaha.
