SHILLONG: Meghalaya a·doko ra·gatchina dabienggipa Inner Line Permit (ILP)-ko man·bebegenchimode uan a·doko dongsogimin Land Transfer Act aro Sixth Schedule baksana a·dokna namgni ong·gen indiba ILP-ko man·jagenchimoba, uan rel gari ba dingtang dingtang kamrangchi a·dokna namroro silroroaniko ra·baanio champengani ong·skana nangjawa ine Sombar salo, a·dokni Cabinet Minister aro United Democratic Party (UDP)-ni dilgipa Kyrmen Shylla aganaha.
“An·chingni ILP-na dabianiko ma·mong sorkari knachakgen ine chinga ka·dongenga indiba ILP-ko man·jagenchimoba uan a·dokni namroro silroroaniko champengani ong·skajachina. Rel gari ba je kamba ong·china, an·chingna namroro silroroanide sokbaaichina aro an·ching re·mikkangna nanga,” ine ua aganaha.
ILP-na dabiani aro rel garirangko ra·baaniara apsan ong·ja ine janapatengon, “Ma·mong sorkari an·chingna ILP-ko on·genchimode aro an·chingna rel garirangara nama ong·ja ine chanchia ong·ode maini gimin an·chingna rel garirangko nanggen? Iako an·ching nangdimatjana,” ine Shylla aganaha.
2014 bilsio a·doko niam gri koela bikotaniko National Green Tribunal (NGT)-ni champengatani ja·man gipin biaprangoni bang·a manderangan re·pilangtokna nangaha ine gisik ra·atpilaniko on·angengon, “Koela bikotaniko NGT-ni champengatani ja·man East Jaintia Hills-o donge bading chiwale cha·enggipa bang·a gipin jatrangan a·doktangtangona re·angpiltokaha. Meghalaya a·doko Land Transfer Act aro Sixth Schedule-an an·chingni a·arangko chel·chakani giminsa uamang biaptangtangona re·pilangna nangaha. Uamang an·chingni a·doko a·arangko bree dongna man·jani giminsa uamang re·angpilna nangaha,” ine Cabinet Minister talataniko on·angaha.
Rel garirangko ra·baanichi gipin biaprangoni niam gri napsrukanirang batgnok ine kenchakanirangna aganchakaniko on·angengon, “Gipin biaprangoni re·baenggipa manderang, rel garirango napsrukbanade man·gen indiba a·dokona sokbae uamang mamingkon dakna man·jawa aro uamang iano a·arangko brena man·jae re·angpilna nangaigen,” ine Shylla aganaha.
ILP-ko a·dokna man·bagenchimode uan a·dokna naljokaniko on·na man·batgen indiba a·doko je dongsogimin niamrangan a·dokna pattiani ong·enga ineba ua aganaha.
Rel garirangko ra·baani bidingo public hearing-rangko ong·ate, manderangni nangnikani ba nangnikgijanirangkoba knatime ra·na nangchongmotenga ineba ua aganaha.
Rel project-rangni bidingo chanchirimna gita sorkarini songe on·gipa committee-o opposition dolrangni bak ong·na nangnikjaengani gimin janapatskaengon, “Ia chanchirimanio bak ra·na sikjaengani ortode uamang iani bidingo mamingkoba tik ka·a dongkuja aro ian nama ong·ja. Na·simang rel gari ra·baako nangnikengama nangnikjaenga uko mesoknade bak ong·na nanggen. Ia chanchirimanio bak ra·esa, an·tangtangni chanchianiko aganpana man·gen. Jangchio dongaianichide maming namgniko ra·bana man·jawa,” ine Shylla aganaha.