SHILLONG: Shillong Government College of Engineering (SGCE)-ni class-rangko ia bilsini August ja dipet a·bachenggnok ine Mongolbar salo, a·dokni Education Minister Rakkam A Sangma parakataha.
Mongolbar salo ua, Shillong-o rikenggipa Engineering College aro Shillong Polytechnic-ko nieani ja·man iako kobor ra·timgiparangna parakataha.
“Da·alo anga official-rang baksa Shillong Engineering College aro Polytechnic-koba nieaha. Ia college-ko nieanio anga college-ni principal aro college-o kam ka·enggiparangkoba grongbaaha. Ia engineering college-ni class-rangko ia bilsiosa kulichengengani gimin anga uamangko grongna nangnikaha,” ine Sangma, kobor ra·timgiparangna aganaha.
Education Minister-ni parakatani gitade, ia engineering college-ni class-rangko August jaonin a·bachenggnok aro da·o admission-ni kamrangko a·bachengmanaha.
“Civil Engineering aro Electrical Engineering course minggninan dam 30 seat-rangko on·china All India Council for Technical Education (AICTE)-o mol·mole seataniko India sorkari ra·chakmanaha,” ine Sangma parakataha.
Nokrangko rikani bidingo sing·anina aganchakaniko on·angengon, nokrangko matchotmanaha aro da·o AICTE-ni bon·kamgipa permission-nasan uamang sengkuenga ine Education Minister parakataha.
“Kamrang pilakan matchotmanaha aro AICTE-ni permission-ko man·soahaon chinga college-ko kulignok,” ine ua aganaha.
College-o skigiparangni gimin janapatskaengon, “Mitam skigiparangkode college-na ra·somanaha aro ia college-ni principal in-charge-ba Shillong Polytechnic-nin ong·gen. College-ni skigiparangkode nangani kri ja·mano ra·dapangkugen. Ia college-o qualify ong·gipa manderang dongaha,” ine Sangma aganaha.
Ia Shillong Government College of Engineering-o Civil aro Electrical undergraduate engineering course-rangko a·bachengna gita adita salrangna skangsan AICTE ra·chakahachim.