SHILLONG: North Eastern Indira Gandhi Regional Institute of Health & Medical Sciences (NEIGRIHMS)-na kamo ra·ani bidingo Khasi Students Union, a·dok sorkari baksa Union Health Minister-ko gronge agangrikna tik ka·angaha.
Iani bidingo KSU-ni dilgiparang, Mongolbar salo a·dokni Tourism Minister Paul Lyngdoh-ko grongenba agangrikangaha.
Batanggimin changoba, iani bidingo a·dok sorkari, KSU aro NEIGRIHMS-ko apsan asonge agangrikna okamaha ine gisik ra·atpilaniko on·angengon, ua somoio a·dok sorkari aro NEIGRIHMS-ni official-rangan, Union Health Minister-ko gronge agangrikna tik ka·ahachim ine KSU-ni general secretary Donald Thabah, kobor ra·timgiparangna parakataha.
NEIGRIHMS-na on·gipa ming 10 dabianirangni giminba KSU gisik ra·atpiltaianiko on·angaha.
Ia institute-o Schedule Tribe (ST)-rangna seat ge·gniko man·dapaha ine janapatengon, da·o dipet NEIGRIHMS-o kamna ra·aniko donkuchina uamang nangnikenga ine KSU-ni general secretary parakataha.
Iani bidingo a·dokni Health Minister aro NEIGRIHMS-ni Director-ko gronge agangrikani ja·man, Union Health Minister-ko gronge agangrikskana man·gen ine ia tom·anio a·dokni Tourism Minister Paul Lyngdoh, KSU-na ku·rachakaniko on·angaha.