SHILLONG: Meghalaya a·dokni pilak sorkari college-rangon chatro chatrirangna uniform-rangko a·bachengatchina gita a·dok sorkari, ge·etaniko on·angaha.
Ia college-rango poraienggipa chatro chatrirangni gisepo dingtangteani dongjana gita aro ku·cholsan ong·aniko mesokna gita sorkarini ja·ku de·aniba ong·enga.
Iani bidingo a·dokni Education department, re·anggipa June 24 tarikon u·iataniko on·manaha aro department-oni u·iatani gitade, a·dokni pilak sorkari college-rangan, an·tangtangni namnika gita uniform-rangko tarina man·gen.
Sorkari college-rango poraienggipa chatro chatrirangni gisepo ku·cholsan ong·aniko mesokna aro meli nangrimaniko ra·bana miksonganio sorkari college-rangoba chatro chatrirangna uniform-rangko a·bachengatna tik ka·aha ine sorkari u·iataha.
Ia chatro chatrirangni gisepo man·e cha·batani ba chol ong·bataniko mesokanikoba champengani gita ong·e, skie ra·anirango chatro chatrirangna nambata cholrangko on·gen ine Education department parakataha.
Meghalaya a·doko college-o poraienggipa chatro chatrirangko uniform ganataniara ian skanggipa ong·ja maina a·doko St Anthony’s College-ko man·chape dingtang dingtang college-rango uniform-rangko ganattokengahachim.