AMPATI: Aadhar card-rangko nipiltaiani bidingo training program-ko Budbar salo, South West Garo Hills a·jani BSF, Police, Election aro DC office-ni manderangna Ampati-ni DRDA Conference Hall-o ong·atangaha.
Ia training program-ko South West Garo Hills District Administration, simarang gita re·ruraanio aro dingtang dingtang kamrango tol·e tarigipa Aadhar card-rangko jakkalanirang batroroengani gimin, manderangni jakkalenggipa Aadhar card-rangko name nipiltaichina miksonganio ong·ataha.
Tol·e tarigipa Aadhar card-rangko name am·sandina aro nipilna gita kam ka·giparangna skie on·na nangenga ine South West Garo Hills a·jani Indo-Bangla simarangko nirokenggipa BSF official-rang didiahani gimin ia training program-ko District Administration, BSF, Police, Election-ni enumerator-rang aro DC office-o kam ka·enggiparangna ong·atangaha.
Ia training program-ko South West Garo Hills a·jani Additional Deputy Commissioner Dolrich BG Momin dilangaha aro ia program-o Assistant Commissioner Meai Kyrpang, Planning department aro gipin department-ni officer-rangba bak ra·angaha.
Ia salsana ong·atanggipa training program-o Guwahati-o donggipa UIDAI Regional Office-ni Project Manager Nazibul Islam, official-rangna agan-skie on·angskaaha.