SHILLONG: Ru·uta bilsirangna tik ka·grikna man·gija donchipgipa Assam-Meghalaya a·dok damgnini sima arini mitampak biaprangko skanggipa phase-o ka·e chu·sokatna man·ani ja·mano dongspa gipin biaprangkoba sima tik ka·e matchotatna gita Inter-State Boundary Survey-ko, adita somoirangna donchipani ja·mano a·bachengattaia.
Ia Inter-State Boundary Survey-ko Assam aro Meghalaya a·dok damgni nangrimenba, Survey of India baksa a·bachengataha. Unbaksana Assam, Nagaland & Tripura, Manipur, Mizoram Geospatial Directorate, Survey of India, Guwahati-o tom·anikoba ong·atangaha.
Field survey ka·aniko ba sima arirangona re·ange nianiko re·anggipa July 1 2025 tarikoni a·bachenga, jeon a·dok damgnini dilgiparang official-rang aro media-ni dongpaanio Hahimona re·angaha. Indake sima ario krongrangkoba songaha.
Unomitingo ge·gipin dolba July 2 tariko Gizang gittimona re·angaha, aro advanced GNSS technology-ko jakkalenba sima-arirangko chin dakangaha.
Indake ong·engon, “Sima-ariko tik ka·anio, A·dok damgnini baksana Survey of India, aro media-ba dongpaani gimin, sima ariko tik ka·anio rongtalen dakna man·aha,” ine Survey of India-oni parakaha.
