SHILLONG: Shillong songjinmani Police Bazar ba Khyndailad ramao ma·manti bostu palbadinggipa manderangko dingtang biapona apjitatanio a·dok sorkari, sakprakna gong 10,000 ka·e tangkako on·gen aro unbaksana biaprangko on·ani ja·man jabongana gong 2000 ka·e japrako on·gen ine Budbar salo, a·dokni Deputy Chief Minister aro Home (Police) Minister Prestone Tynsong parakataha.
Khyndailad-o bostu pale cha·enggipa manderangko dingtang biapona apjitataniara uamangko dokkol ka·e rona miksongani ong·ja indiba uamangni namgninan dingtang biapona apjitatenga ineba ua aganaha.
Tynsong-ni aganani gitade, Khyndailad-o bostu pale cha·enggiparangko gipin biapona apjitataniara uamangni namgninan ong·enga aro uamangko dingtang biapona apjitatanio sorkari, pilak nanga dakchakanirangkoba on·enga.
Khyndailad ramao ma·manti bosturangko pale cha·enggipa manderangni namgninan sorkari, dingtang biapona apjitatengachim indiba uamangoni mitamrang, an·tangtangnan neng·nikanirangkosa ra·bana jotton ka·skaenga ineba ua aganaha.
“Chinga uamangko dokkol ka·e rona iako dakenga ong·ja indiba uamangni namgninasa. Iandake ramarango bostu palbadinge cha·giparangni namgnina chanchigipa gipin sorkari na·simang nikjawa. Uamangko apjitanio sorkari, uamang sakpraknan gong 10,000-ko on·enga aro apjitman·ahaon uamangna jabongana kingking gong 2000 ka·e on·kugen,” ine Tynsong parakataha.
Bostu palbadinge cha·gipa manderangni dongpagipa town vending committee, ia manderangko dingtang biapona apjitna gita kamrangko ka·enga aro iani bidingo badita chang tom·e chanchirimanirangkoba dakaha ineba ua aganaha.
Ia kamo committee baksa bakrimchina bostu pale cha·giparangko didiatengon, uamango maiba neng·nikanirang donggenchimode committee-ona apsan chanchirimna ra·bana man·gen ine Deputy Chief Minister parakataha.
“Uni gimin anga Khyndailad ramao bostu pale cha·enggipa pilak manderangkon mol·molna ska, na·simang an·tangtangni neng·nikanirangko ia committee-ona ra·bana man·aigen aro na·simangni neng·nikanirangko committee niataigen. Sorkarini gitaba chinga uamangko a·rikgalna sikani dongja,” ine Tynsong aganaha.
Khyndailad ramao ma·manti bosturangko pale cha·enggipa manderangko Shillong Municipal Board (SMB) a·rikgalna a·bachengahani gimin Mongolbar salo, ia manderang, Secretariat mikkango jegalanirangko dakangskaahachim.