SHILLONG: Meghalaya a·dokni sorkari lower primary (LP) skulrangna skigiparangko ra·ani kamrang matchotangengaha ine Budbar salo, a·dokni Education Minister Rakkam A Sangma parakataha.
“Kamrangko anga changni chang nipiltaitaienga. South Garo Hills a·jaode bangbang ong·e dongenggipa kamrangko jadokna skangan u·iatmanaha aro da·o gipin a·jarangoba roster-ko tariengkua,” ine Sangma, kobor ra·timgiparangna aganaha.
Pilak a·jarangon skigiparangko kamo ra·na gita antisani gisepon u·iatanirangko (advertisement) on·na ka·dongenga ineba Education Minister parakataha.
Dingtang dingtang kamrango neng·nikanirang dongani a·selsa skigiparangko kamo ra·anio ja·manchakna nangaha ine janapatengon, pilak skulrangan skigipa gri ong·jana gita ua man·a dipet skigiparangko ta·raken kamo ra·na jotton ka·enga ine Sangma parakataha.
Sorkari LP skulrango ge 600-na baten skigiparangni kam bangbang ong·e dongenga aro higher secondary skulrangoba ge 150-200-mangni gita skigiparangni kam bangbang ong·e dongenga ine Education Minister parakataha.
Secondary skulrangko higher secondary skulni gadangona ra·dona gita sorkari rakbee kamko ka·enga ine janapatskaengon, ia bilsini gisepo dam 30-na baten secondary skulrangko higher secondary-ni gadangona ra·doatna man·aha ine Sangma aganaha.
Ia bilsio SSLC porikkako pass ka·gipa candidate-rang bang·batahani gimin chatro chatrirangna biaprangko tikate on·na man·na gita Kiang Nangbah College-o evening section-ko kuliaha ineba Education Minister parakataha.