SHILLONG: Bading chiwalgiparangoniko aro dokkan dakgiparangoniko niam gri tangka gile ra·enggipa manderangni kosako a·dok sorkari, rakgipa ja·kurangko de·na mikrakataniko on·angaha.
Iani bidingo kobor ra·timgiparangna talataniko on·angengon, iandake niam gri tangka paisa gile ra·enggipa manderangko rim·a man·genchimode niamo pangchake rakgipa sastirangko on·gen ine a·dokni Deputy Chief Minister aro Home (Police) Minister Prestone Tynsong, mikrakataniko on·angaha.
Khasi-Jaintia Hills jolrango bobil dake chakatenggipa Hynniewtrep National Liberation Council (HNLC) dol aro dingtang dingtang NGO-rang, bading chiwalgiparangoniko tangka dabie ra·enga ine badi ka·anirangko man·ahani gimin a·dokni Deputy Chief Minister, mikrakataniko on·angaha.
Iandake tangka dabie seatgipa chittirangko man·soon, sorkarina aro police-rangna u·iatchina gitaba ua, bading chiwalgiparangko aro dokkan dake cha·enggipa manderangko didiataha.
Iandake tangka dabiani lekkarangko man·soon bang·bata manderangan sorkarina aro police-rangna u·iatrongjani a·selan dos dakgipa manderangko rim·na man·rongjaenga ineba ua aganaha.