SHILLONG: Meghalaya a·dokona, mongsongbate Khasi aro Jaintia Hills a·jarangona rel garirangko ra·baani bidingo chanchirimna gita sorkarini songe on·gipa committee-o opposition dolrang bak ra·pajana parakatani ja·man, Khasi Students Union (KSU)-ba ia chanchirimaniona an·tangtangko okamjachina sorkariko didiataha.
KSU-ni general secretary Donald Thabah-ni aganani gitade, a·dokona niam gri napsrukanirangko champengna Inner Line Permit (ILP) gita bilakgipa niamrangko ra·gatchenggija rel garirangko ra·napbagenchimode, niam gri napsrukbae songdonggipa manderang batgnok ine kenchakanirang dongengani gimin uamang da·o dipet rel garirangni bidingo chanchirimanio bak ra·pana nangnikkujaenga.
“Da·o dipet chinga rel garirangko nangnikkujaengani gimin ia chanchirimaniona chingko okamsrangjachina chinga sorkariko didienga,” ine ua aganaha.
Rel project-ni bidingo chanchirimna gita sorkarini committee-ko songani da·o jagittam ong·na sipilengahachim indiba ia committee-o MDA sorkario bakrimenggipa political party-rangna agrede Opposition dolrangko man·chape darang dolrangan bak ra·na nangniktokskajaenga.
Ia committee-ni gita a·dok sorkari, dingtang dingtang political dolrang baksa rel project-rangni bidingo chanchirimchengenba ja·man gipin dolrang baksaba chanchirimna miksongengachim.
Indake ong·engon, a·dokni dingtang dingtang biaprango facilitation centre-rangko aro entry-exit point-rangko done, Meghalaya Residents Safety & Security Act (MRSSA)-ko kakket aro bebeo ja·rikchina gitaba KSU dabiangaha.
Tribal jatrangko chel·chakna gita ILP aro MRSSA minggnikon a·doko ra·gatna nanga ine dabiangengon, ILP-ni bidingo KSU, baditaba chang Home Affairs Ministry-na sedoatahachim indiba uamangni dabianirangna nachil songjaenga ine Thabah aganaha.
Meghalaya a·dokara gipin a·dokrangona re·pak dopakna nanggipa biap ong·e ILP-ko ra·gatanio neng·nikanirangko chagrongna nangenga ine agangipa kattarangna aganchakaniko on·angskaengon, ILP donggipa Nagaland a·dok gitaba gipin a·dokni manderang re·pak dopakna nangenga aro Manipur a·dokni manderangba gipin biaprangona re·angengon pangnan Nagaland a·dokko nappakesa re·na nangenga ine KSU-ni general secretary toe parakataha.