TURA: Ja·manchake koborko man·soani gitade, re·anggipa antio, Raksamgre Sub-Division ning·o, bilsi 16 ong·gipa me·chik bi·sa saksako, uni nokoniko rim·draangenba drae til·ekaha. Ia a·sel ong·ani ja·man, dos dakgipa mandeni kosako Tikrikilla police station-o FIR ka·aha aro dos dakgipa mandeko police-rang rim·na man·aha.
Koborko on·ani gitade, ia me·chik bi·sa, re·anggipa June 30 tarik pringwalni 3:30 bajimangonin nokoni gimaaha aro iani bidingo nokdangni manderang, July-ni 2 tarikosa FIR ka·aha.
Ia me·chik bi·sani gimaani ja·man, uni nombor-ona phone ka·on, uko rim·draanggipa Balsring K Sangma-sa uni phone-ko ra·chakaha ineba me·chik ma·a paa aganaha.
Iani ja·man, me·chikni ma·drangrang, matnanga man·gipa mandeni nokona re·angon, uano me·asani ma·drangrang, atte aro gantongrangko ra·e sengsoskaaha aro uamangko chadrapsoaha ineba u·iataha.
FIR-o parakani gitade, me·asa ma·drangrangni chadrapanio, me·chikni pagipaba saknaanirangko man·aha indiba uamang me·chikkode ua nokoniko rime ra·bana man·aha.
Ia me·chikko ua me·asa, uni nokoniko rim·drae ra·angenba drae til·ekaha aro uko ka·mikkenataha ineba FIR-o janapaha.
Ia a·selni bidingo talataniko on·angengon, FIR-ko Tura police station-o ka·aha aro matnanga man·gipa mandeko rim·aha ine West Garo Hills a·jani SP Abraham T Sangma parakataha.