TURA: Meghalaya Garo Hills-oni sak 4 jatni bewalo samgittingchi sangipa ojarangna Quality Council of India-ni ra·chakako man·gipa Northeastern Christian University (NECU), Dimapur-oni Vocational Certificate Scheme for Traditional Community Healthcare Providers (VCS-TCHP)-oni gita Certificate-rangko on·angaha. Ia Certificate-rangko on·a skang NECU ni official-rang Garo Hills-ona songrebae Jatni bewalo sana bananirangko u·ie ra·angaha. Uamangni dol samni rokomrangko niangan baksana maidake jakala aro maidake sana bananiko on·a uarangko name dake niangaha. Jatni bewalo samgittingchi ba samachikchi sana bananio certificate-rangko man·giparangara, West Garo Hills Tura-oni Dr. Vidyanist Marak, North Garo Hills Bajengdoba-oni Bitharson Ch Sangma aro South West Garo Hills Ampati-oni Joni Ch Marak aro Kenalson M Sangma ong·a. Dr. Vidyanist Marak-na Jaundice saaniko sana bananio pangchake certificate-ko on·aha. Ia certificate-ko man·ania ian mingsa Meghalaya a·dokni manderangsan ong·aigija a·palchinaba ba a·song gipinchinaba A·chikrangni jatni dakbewal samgittingchi ba samachikchi sana bananiko u·iatna man·gnok aro sana bana re·bana gita sandibana man·gnok ine Marak aganangaha aro Meghalaya a·dok sorkarikoba samachikchi sana bananiko tangdoatna dakchakanirangko on·enganiba ua mittelangaha.
