SHILLONG: National People’s Party (NPP)-chi dilenggipa MDA sorkari II-ko chalaiani bilsigni ata gapna siengahani gimin Cabinet-ko sualpiltaiani cholrang dongnaba gnang ine chanchichipanirang ong·katengon, Cabinet-o United Democratic Party (UDP)-na tikatgipa biaprangko sualgrike ra·ani bidingo da·o dipet party-ni gisepo maming chanchirima dongkuja ine UDP-ni dilgipa aro a·dokni Cabinet Minister Kyrmen Shylla parakataha.
Iani bidingo kobor ra·timgipa manderang baksa agangrikengon, Cabinet-ni biapko sakgipin MLA-na on·skachina party nangnikgenchimode ua an·tangni biapko wate on·na kusi ong·aigen ine Sombar salo, Shylla gisik ra·attaianiko on·angaha.
“Cabinet-ko sualpiltaiani bidingo manderang jijagriktokengon, da·o dipet party-ni gisepo Cabinet-ni biapko sregrike ra·na maming chanchia dongkuja. Indiba party-ni dilgiparang, angko wate on·china nangnikode anga kusi ong·en an·tangni biapko sakgipinna wate on·na man·aigen maina anga party-ni a·selsa ia gadango ong·paenga,” ine Shylla aganaha.
UDP-ni ning·o meligrikgijanirang ong·enga ine agananiko jegalatengon, Cabinet-ni biapko sregrike ra·na nanggenchimoba, party-ni sak 12 MLA-rang aro party worker-rang baksa tom·e chanchirimchengesa ja·kuko de·aigen ine UDP Minister parakataha.
Cabinet-ni biapna UDP-ni gisepo maming golmalrang dongja ine a·kangatskaengon, da·o dipet darangba iani bidingo party-na badi ka·anirang dongkuja aro UDP-ni dilgiparangba iani bidingo apsan agan-chanchirimna kusi ong·aigen ine Shylla parakataha.
NPP, UDP, HSPDP aro BJP-ni nangrime chalaienggipa MDA-II sorkariko chalaiani bakan bilsigni ata gapna siengaha aro iani giminan bang·a manderangan Cabinet-ko gital dake sualpiltaiani cholrang donga ine chanchichiptokengachim.
MDA sorkariko dilenggipa NPP-de iani bidingo da·o dipet maming ku·rangko on·skakujaengachim.
Indake ong·engon, a·doko Voice of the People’s Party (VPP) bilakbaroroenga ine agananikoba UDP MLA raken jegalataha aro re·baenggipa 2028 bilsini Assembly election-o chegipa ong·na UDP, kamrangko name ka·angkuna nanggen ine aganskaaha.
“Chinga kamrangko name ka·a ong·ode darangba chingko champengna man·jawa indiba chinga name dakja ong·ode chinga mamingkoba dakna man·jawa,” ine Shylla aganaha.
 |
|