TURA: East Garo Hills a·jani Bansam A·we aro Rongakgre Samanda-o Jal Jeevan Mission (JJM)-ni kamrangko niam gita ka·ja ine Garo Hills Youth Solidarity (GHYS), PHE Williamnagar-ni Executive Engineer-na badi ka·e sedoataha.
GHYS-ni parakatani gitade, Bansam A·we songo gong 29,41,000-ni Elevated Service Reservoir-ko rikna gita Detailed Project Report (DPR)-o mesokani dongachim indiba ia biapona re·ange nigenchimode ia biapo Elevated Service Reservoir-ko rikani dongjachim. Apsan daken, Rongakgre Samanda songoba gong 38,35,100-ni Ground Zonal Reservoir-ko rikna gita DPR-ode janapani dongachim indiba ia biapo Ground Zonal Reservoir-koba rikjaha ine GHYS parakataha.
Una agreba, Bansam A·we songna chirangko Treatment Plant-ni Main Clear Water Reservoir-onikosa sale on·na nangachim indiba ia kamko ka·gipa contractor, Megagre Songgitcham sub-tank (Ground Zonal Reservoir)-onikosa sale on·skaaha. Iandake chirangko dingtang biapona sale on·ani a·selan song damgnina chirangko salani ja·man Bansam A·we songnade chirangan chu·ongjaenga ine GHYS badi ka·doangaha.
“Rongakgre Samanda songnaba chirangko treatment plant-ni water reservoir-onikosa sale on·na nangachim indiba chirangko, Megagre songgitcham sub-tank (Ground Zonal Reservoir)-onikosa salahani a·sel Rongakgre songnaba chirang chu·ongjaengaha,” ine GHYS-ni president parakataha.
Iani bidingo ta·raken sandirokatchina gita PHE official-rangko didiatengon, ia kamko ta·raken jako ra·e niatjagenchimode uamang, chubata gadangona re·ange badi ka·doangskagen ine GHYS mikrakataniko on·angaha.