PHULBARI: Rajabala-oni Phulbari-ona dakanggipa Agia-Medhipara-Phulbari-Tura (AMPT) ramani km 22 ong·gipa bakrang namsrangjahani gimin jolo songdongenggipa manderang suk ong·gijaniko parakattokaha.
Kobor on·timgiparangni u·iatani gitade, ia km 22 ong·gipa ramani bakrangko jadokmangna skangsan taripile on·ahachim indiba da·on ia ramarang nosto ong·na a·bachengtaiahani a·sel ramako re·ruraenggipa manderang neng·nikanirangko chagrongna nangtokengahachim.
Ia ramani obosta namsrangjahani gimin an·tangni suk ong·gijaniko parakatengon, “Rajabala-oni Phulbari-ona km 22 ong·gipa ramako re·namangmangan kontasa atamang nangenga aro ramani bang·bata bakon gariko 3rd gear-o re·na man·jaenga. Gario re·ako donsrangaibo, ia rama gita ja·amangmangchi re·on manderang neng·nikanirangko chagrongna nangenga,” ine New Bhaitbari songni mande saksa aganaha.
Batanggimin bilsignimangonin ia ramani obosta namjani a·selan jolo songdongenggipa manderang neng·nikanirangko chagrongna nangtokenga ineba mitam manderang parakataha.
“Ia ramako songreon, nang·ni kang·kare aro ja·arangsa neng·na a·bachengaia. Ramani obosta inditan namsrangjaha da·o an·o donggipa me·chikrangko an·pakna gita hospital-rangona ra·angon, ramaon me·chikrangni an·pakchanganirangko nikna man·aha,” ine songni mande saksa aganaha.
Ramako taridapanio, a·dubek aro ro·ongrangchisan taridapenga ineba songni manderang, suk ong·gijaniko parakattokaha.
“Ramako a·dubek aro ro·ongrangchisa taridapengani gimin mikkarang waahaode batesa rama namjabate re·ruraanio neng·nikanirangko man·batenga. Mikka wajaoba a·dimurara dake manderang neng·nikanirangko man·skaronga. Iani bidingo chinga baditaba chang department official-rangna u·iatahachim indiba da·alonan maming namdapatanirang dongja,” ine songni mande saksa aganaha.
