SHILLONG: A·doko tangka paisani gita neng·nikanirangko chagrongna nangenga inenba, a·doko bijoli on·ani kamrangko nambatatna gita North Eastern Region Power System Improvement Project (NERPSIP)-ni ning·o tangka paisarangko dakchake on·china gita a·dokni Power Minister AT Mondal, Union Power Ministry-ko didiataha.
Re·anggipa June jani 4 tariko, Shillong-o chang 16-gipa National Power Committee (NPC)-ni tom·aniko ong·atani bidingo kobor ra·timgiparangna talataniko on·angengon, 2031-2032 bilsirangona ra·doatgipa Meghalaya a·dokni long-term transmission plan-ko Central Electricity Authority (CEA) ra·chakmanaha ine Mondal parakataha.
Power Minister-ni aganani gitade, ia transmission plan-ni ning·o 760 MVA-ni additional transformation capacity aro 1090 circuit kilometer-koba man·chapenga aro iana gong kror 2,270 korosrangko hisapenga.
“Tangka paisarangoni mitamde a·dok sorkarioni aro mitamde DoNER Ministry-oni sokbaaha indiba tangka paisani gita neng·nikanirangko chagrongna nangkuengani gimin NERPSIP-ni ning·o tangka paisarangko dakchake on·dapchina chinga Power Ministry-ko mol·molataha,” ine Mondal aganaha.
Salgro salaram a·dokrango mongsonggipa project-rangko bon·chongdikatgipa Power System Development Fund (PSDF)-ko chipatani giminba Power Minister parakataha.
Baghmara gita dake a·song damgnini simao donggipa biaprango 132/33 kV substation-ko nangengani giminba Power Minister janapangaha.
“South Garo Hills a·jao donggipa 33kV line-rangko, buringrang gita aro mongma ramarang gitasa ra·ani a·sel dingtang dingtang neng·nikanirangko chagrongna nangengani gimin 132 kV line-ko man·genchimode ia neng·nikanirangko chel·chakna dakchakgen,” ine Mondal aganaha.
South Garo Hills, South West Khasi Hills aro West Khasi Hills a·jarango bijolirang sibatrongani gimin bijoli on·aniko namdapatna gita sorkarini manchisoenggipa kamrangni giminba Mondal talate on·angaha.
Bangladesh a·song baksa bijoli badinggrikani gimin janapatengon, Meghalaya a·doko gipinrangna watskana gita gitchae bijolirang dongja aro Bangladesh a·songoba bijolirang chu·ongjani gimin a·dokona ra·baskanaba man·jawa ine Power Minister parakataha.
Byrnihat-o donggipa karkanarangni bijolini kajinarang bang·dugae sokenga ine badi ka·anirangna aganchakaniko on·angengon, “Kajinarangko State Electricity Regulatory Commission-sa tarienga MeECL-de tarija. Uamango maiba neng·nikanirang donggenchimode uamang Commission-ona re·ange badi ka·ena man·a,” ine Mondal aganaha.
 |
|