TURA: West Garo Hills a·jani a·kawe jolrang, jekai Rajabala, Bhaitbari, Phulbari, Tikrikilla aro uandakgipa biaprango, niam gri Election Photo Identity Card (EPIC)-ko tarie ra·anirang batroroenga ine A·chik Conscious Holistically Integrated Krima (ACHIK) parakatenba, ia jolrango EPIC tarina dorgasto galenggipa manderangni lekkarangko name nipilchengchina a·dokni Chief Electoral Officer (CEO)-ko didiataha.
Iani bidingo a·dokni CEO-na badi ka·e sedoatengon, “West Garo Hills a·jani a·kawe jolrango bang·a manderangan, tol·e tarigipa residential certificate aro no objection certificate-rangko mesoke, EPIC-rangko man·enga ine chinga koborrangko man·soaha aro ian election-ni kamrango olgrokaniko mesokani ong·enga,” ine ACHIK parakatenba, EPIC-rangko on·na skang, dorgasto galenggipa manderangni lekkarangko name nipiltaichina gita CEO-ko didiataha.
Ia jolrango EPIC-na dorgasto galenggipa manderangni residential certificate aro NOC gita dakgipa lekkarangko name nipiltaichina didiatengon, iandake EPIC on·anio chong·mot lekkarangko sandianiara, election-ni kamrangko nambatatna dakchakanisan ong·aigija mikkangchi iandake niam gri electoral roll-rango biming segataniko champengna dakchakaniba ong·gen ine ACHIK parakataha.