SHILLONG: Meghalaya a·dokni skotong Shillong songjinmao gital rikgipa Polo Shopping Mall-ko Bristibar salo, Union Finance Minister Nirmala Sitharaman-ni jakchi nokdonggae on·angaha aro ia shopping mall-ko nokdonggae on·anio, a·dokni Chief Minister Conrad K Sangma, Deputy Chief Minister Sniawbhalang Dhar, Health Minister Ampareen Lyngdoh, Commissioner & Secretary Vijay Kumar aro Urban Affairs-ni Director PK Boro-ba dongpae bak ra·angaha.
Ia Polo Shopping Mall-ko Shillong Smart City Project-ni ning·o gong kror 85 korosrangchi Badri Rai Company rikaha aro ia shopping mall-ni apalaniara square feet lakh 1.5 ong·a.
Ia gadangdok donggipa shopping mall-o dam 109 dokkanrang donggen aro iako garirangko donchakani biaprangba donggen.
Ia shopping mall-o dam 12 escalator, dam 5 lift-rang, food court, EV charging station-rang, bongagipa aro dokgipa gadango office-rang aro bi·sarangni biaprangba donggen.
Ia shopping mall-ko rikna gita 2020 bilsini October 28 tariko pangchakaniko songaha aro kamrangko 2024 bilsini December jao matchotaha.
Ia Polo Shopping Mall-ko nokdonggae on·anganio a·dokni Chief Minister Conrad K Sangma, jinmana aganprakangengon, ia shopping complex-ko nokdonggae on·ahani gimin Union Finance Minister Nirmala Sitharaman-ko mittelpilangenba, uni salgittamna Meghalaya a·dokona re·baaniara namen gisik ra·na krabegipa somoi ong·a ine parakataha.
A·doko iandakgipa nokrangko rikna gita Special Assistance to States for Capital Investment (SASCII) scheme-ko on·engani giminba ua Union Finance Minister-ko mittelpilangaha.
Photo: Shillong songjinmao gital rikgipa Polo Shopping Mall-ko Union Finance Minister Nirmala Sitharaman, nokdonggae on·enga.