TURA: West Garo Hills a·jani a·kawe jolrang, jedake Rajabala, Pulbari, Tikrikilla aro Hallidayganj jolrangna Women Police Station aro Women Help Desks-ko kulichina gita All Meghalaya Minorities Student Union (AMMSU), Meghalaya a·dokni Director General of Police (DGP)-ko mol·molataha.
DGP-na sedoatgipa chittio AMMSU-ni janapatani gitade, a·kawe jolrango Womens police station dongkujani a·sel me·chikrangni nangchongmotgipa kamrangko ka·anio aro me·chikrangna naljokanirangko on·anio neng·nikanirangko chagrongna nangenga.
“Tura Women Police Station, West Garo Hills a·ja gimikni kamrangkon jako ra·e nirokna nangenga. Indake ong·genchimoba Tura jillani chel·ao ba songadamrango dongenggipa manderang, mongsongbate a·kawe jolrangode womens police dongjani a·sel, me·chikrangna somoi gita chel·chakani aro dakchakanirangko on·na man·ja. Badi ka·anirangoba neng·nikaniko man·a aro ku·sik agananirangoba neng·nikaniko chagrongna nanga. Uni gimin ta·raken West Garo Hills a·jani a·kawe jolrango Women Police Station aro Women Help Desks-ko kulina nanga,” ine AMMSU janapatenba, ia Women’s police station-o Senior Women Police Officer-ko donan baksana Bengali aro gipin ku·sikrangko man·gipa staff-koba DGP-ko mol·molataha.
West Garo Hills a·jani a·kawe jolrango Women’s Police Station dongjani a·selo jolni me·chikrang aro chongipa jatrang, dingtang dingtang kamrangko ka·anio aro chel·chakanirangko nangan somoirango neng·nikanirangko chagrongna nangenga ine janapatengon, jolo songdongenggipa manderang, mongsongbate me·chikrang, iandakgipa neng·nikanirangko chagrongna nangjana gita ta·raken Women’s police station-ko kulina nangenga ine AMMSU-ni president Nur Islam parakataha.
